Россия ва Украина нималарга келишиб олди?

Кеча, 23 июль куни Туркиянинг Истанбул шаҳрида жойлашган Чироғон саройида Россия ва Украина делегациялари ўртасида учинчи раунд музокаралари бўлиб ўтди. Музокараларда томонлар олдинги (2 июндаги) учрашувда алмашилган муҳокама меморандумлари бўйича фикр алмашди.

Музокараларда Россия делегациясига Президент ёрдамчиси Владимир Мединский, Украина томонига эса яқинда Украина Хавфсизлик ва мудофаа кенгаши котиби этиб тайинланган Рустам Умаров бошчилик қилди. Музокараларда асосан аввалги учрашувда алмашилган меморандумлар муҳокама қилинди.

Россия делегацияси раҳбари Владимир Мединский қуйидагиларни эълон қилди:

• Учта онлайн ишчи гуруҳ тузиш – сиёсий, гуманитар ва ҳарбий йўналишларда;
• 24-48 соатлик қисқа муддатли ўт очишни тўхтатиш келишувлари жорий қилиш – ярадорларни олиб чиқиш ва ҳалок бўлганлар жасадини эвакуация қилиш учун;
• Украина томонидан ушлаб турилган фуқаролар, хусусан Курск вилоятидаги 30 кишининг қайтарилиши;
• Россия яна Украинага 3 минг жасадни топшириши;
• Ҳарбий асирлар алмашуви;
• Президентлар даражасида учрашув ўтказиш учун аввал аниқ тинчлик битими ишлаб чиқилиши.

Украина томони эса Президентлар даражасида, яъни Зеленский ва Путин иштирокида АҚШ Президенти Дональд Трамп ва Туркия Президенти Ражаб Тойиб Эрдўған воситачилигида музокара ўтказишни таклиф этди. Киевнинг асосий талаби – зудлик билан ва тўлиқ ўт очишни тўхтатиш. Украина, шунингдек, инфраструктура объектларига ҳужумларни тўхтатишга тайёрлигини билдирган ва 3 йилдан ортиқ асирликда бўлган 1200 нафар шахсни алмашишни таклиф қилган.

Томонлар позициялари ҳали ҳам сезиларли даражада фарқ қилмоқда, аммо улар музокараларни давом эттиришга тайёрлик билдирган. Россия томонидан тақдим этилган меморандумда ҳудудий масалалар, Украина ҳарбий кучларини қисқартириш ва нейтрал мақомини тасдиқлаш каби шартлар илгари сурилган бўлса, Украина томонининг ҳужжатида эса ўт очишни тўхтатиш ва ишончни мустаҳкамлаш чораларига урғу берилган.

Музокаралардан сўнг, бугун, 24 июлга ўтар кечаси Москва ва Киев бир-бирига қарши дрон ҳужумлари уюштирди.

Маълумот учун, музокараларнинг биринчи раунди 16 май куни Истанбулдаги Долмабахче саройида бўлиб ўтди. 2 июнь куни бўлиб ўтган иккинчи музокаралар чоғида эса Россия ва Украина оғир яраланган аскарлар ва 25 ёшгача бўлган асирларни алмашиш, шунингдек, урушда ҳалок бўлган ҳарбий хизматчиларнинг 6000 жасадини бир-бирига топширишга келишиб олди. Шундан сўнг, бир қатор ҳарбий асирлар алмашинуви бўлиб ўтди – хусусан, 9, 10, 12, 19, 20, 26 июнь ва 4 июль кунлари. Шу билан бирга, ўликларнинг жасадларини алмаштириш давом этмоқда.