Россия Украинадан сигнал кутмоқда – Песков

Украина Россия билан тўғридан тўғри музокараларни қайта бошлашга тайёрлиги ҳақида сигнал бериши керак. Бу ҳақда Россия Президенти матбуот котиби Дмитрий Песков бугун, 28 апрель куни журналистлар билан бўлиб ўтган матбуот анжуманида сўз очди.

Маълум қилинишича, журналистлар Президент матбуот котибига “Москва келишув бўйича кимдан сигнал кутмоқда – Вашингтонданми ёки тўғридан тўғри Киевданми?”, дея савол берган.

Песков эса ушбу саволга Украина биринчи бўлиб сигнал бериши кераклигини таъкидлкаб ўтган.

“Киевдан. Ҳеч бўлмаганда Киев бу борада нимадир қилиши керак. Уларда эса бунга қонунан тақиқ қўйилган. Аммо ҳозирча ҳеч қандай ҳаракатни кўрмаяпмиз”, деган матбуот котиби.

Маълумот учун, 2022 йил октябрь ойида Украина Президенти Владимир Зеленский Россия Президенти Владимир Путин билан музокаралар ўтказиш имкониятини чекловчи фармонни имзолаганди. 2025 йил 22 апрелда Зеленский Киев фақат ўт очишни тўхтатиш шарти билан Москва билан тўғридан тўғри музокараларни бошлашга тайёрлигини билдирди.

Эслатиб ўтамиз, аввалроқ Владимир Путин Киевнинг фуқаролик инфратузилмасига зарба беришни тўхтатиш ҳақидаги таклифини ўрганишини ҳамда Россия ва Украина ўртасида тўғридан тўғри музокаралар ўтказишга рухсат беришини айтган эди.