Россия Эронга ракеталар учун қурилмаларни сотишга рози бўлди – ОАВ

Россия корхоналари кўп мақсадли бошқарилувчи ракеталар учун камида 90 та учириш қурилмасини – Москванинг ўзи томонидан Украинага қарши урушда кенг қўлланилаётган замонавий қурол-яроғларни етказиб бериш бўйича иш олиб борган. Бу ҳақда “Dallas Analytics” таҳлилчилари ўз ихтиёрига келиб тушган “Вымпел” конструкторлик бюросининг 2024–2025 йилларга мўлжалланган ишлаб чиқариш режасига таяниб хабар берди.

Қайд этилишича, товарларни қабул қилувчилар К-10 коди остида қайд этилган. Эрон айнан шундай белгиланади. Эронга “Изделие 305” ёки Х-39 сифатида маълум бўлган ракета учун учириш ускуналари етказиб берилиши керак. Улар, қоида тариқасида, вертолётларга ўрнатилади. Бундай ракета 25 килограммлик жанговар қисмга ва электро-оптик ўз-ўзини нишонга олиш каллагига эга. Шунга қарамай, оператор ҳам уни парвоз вақтида бошқариши мумкин.

Масалан, бундай қурилмаларни Россиянинг Ми-28 вертолётларига ўрнатиш мумкин. Москва уларни ҳам Эронга етказиб бермоқда.

Таҳлилчилар фотосуратлар орқали вертолётлар етказиб берилганини тасдиқлашга муваффақ бўлган, аммо учириш қурилмалари етказилганини эмас. Уларнинг экспорт партиялари 2024 йилнинг охиридан 2025 йилнинг декабригача бўлган даврга режалаштирилган, аммо улар юборилган-юборилмагани номаълумлигича қолмоқда. 

“The Washington Post”нинг ёзишича, қурол-яроғ етказиб беришдан ташқари, Россия Эрон билан разведка маълумотларини ҳам алмашади. 

Ушбу маълумотлар, бошқа нарсалар қаторида, жорий йилдаги уруш пайтида Яқин Шарқдаги Америка кучларига ҳужум қилиш учун ишлатилган бўлиши мумкин. 

“Қурол етказиб беришни Москва ўз армиясининг эҳтиёжларига қарамай давом эттирмоқда”, деб қайд этади “Financial Times” газетаси. 

Бу Россия ва Эрон Яқин Шарқдаги уруш даврида ўз шериклигини янада мустаҳкамлаганидан далолат беради.