Россия “қора рўйхати”дан 160 мингга яқин ўзбекистонликнинг исми ўчирилди

Россия Ички ишлар вазирлигининг назорати остидаги шахслар реестридан 160 мингга яқин Ўзбекистон фуқароси чиқариб ташланди. Бу ҳақда “Дунё” ахборот агентлиги хабар берди.

Қайд этилишича, уларнинг 70 мингдан ортиғи миграция органларида ҳуқуқий мақомини тартибга солгани, қолганлари эса Россиядан белгиланган муддатларда чиқиб кетгани ёки бошқа сабабларга кўра чиқарилган.

Айтилишича, 2025 йилнинг 9 ойи давомида Ўзбекистоннинг Россиядаги дипломатик ваколатхоналари ва консуллик муассасалари томонидан 50 минг 172 та мурожаат кўриб чиқилган. 3246 фуқарога ишга жойлашиш ёки ишда келиб чиққан меҳнат низоларини ҳал этишда ёрдам кўрсатилган. 276 та иш берувчи билан музокаралар ўтказилган. 58 минг 677 та янги иш ўрни аниқланган. 381 фуқарога виждонсиз иш берувчилардан 309 минг 918 доллар миқдорида маошни ундиришда ёрдам берилган, 44 та потенциал иш берувчининг ишончлилиги текширилган.

Шунингдек, 1323 фуқарога иш берувчилар томонидан ноқонуний тарзда олиб қўйилган паспортлари қайтариб берилган. Оғир вазиятга тушиб қолган 552 фуқарога 125 минг 303 доллар миқдорида молиявий ва моддий ёрдам кўрсатилган.

Бундан ташқари, хабарда жорий йилнинг 1 январидан 10 сентябрига қадар миграция амнистияси жорий этилгани мазмунини фуқароларга тушунтириш, уларни белгиланган муддатларда миграция органларига мурожаат қилиш ёки Россиядан чиқиб кетиш билан ҳуқуқий мақомни тартибга солишга чақириш бўйича амалга оширилган комплекс тадбирларда Россиядаги Ўзбекистон консуллик муассасаларига легализация масаласи бўйича 84 минг 409 фуқаро мурожаат қилгани ва уларга тегишли маслаҳатлар берилгани келтирилган.

Йирик корхоналар ва фуқаролар яшайдиган жойларда 221 та сайёр учрашув ташкил этилган, уларда тахминан 20 минг ўзбекистонлик иштирок этган.

Ноқонуний бўлиб турган фуқароларни паспортизация қилиш доирасида консуллик муассасалари томонидан 5758 фуқаронинг хориж паспортини расмийлаштириш учун ҳужжатлари қабул қилинган.

Ҳужжатларини йўқотган ёки пулсиз қолган, шу жумладан, Россия ИИВнинг махсус ҳибисхоналарида сақланаётган 1929 нафар, жами 17 минг 479 фуқарога ватанга қайтишда кўмаклашилган. Шу билан бир қаторда, Ўзбекистоннинг ҳуқуқий мақомини тартибга солиш учун асосга эга бўлмаган 1560 фуқарога ватанга қайтишига авиачипта сотиб олиб берилган.

Эслатиб ўтамиз, аввалроқ Россия Президенти Владимир Путин хорижий ишчилар билан меҳнат шартномасини бекор қилиш асосларини кенгайтирувчи қонунни имзолаганди.