Расман: Ташиев яна бир лавозимидан ўзи воз кечди

Қирғизистон Миллий хавфсизлик давлат қўмитасининг собиқ раиси Қамчибек Ташиев яна бир лавозимидан кетишини эълон қилди. У Қирғизистон футбол иттифоқи президенти лавозимидан кетади. Бу ҳақда Ташиевнинг ўзи Қирғизистон футбол иттифоқининг бугун, 15 апрель куни Бишкекда бўлиб ўтаётган навбатдаги конгрессида маълум қилди. 

“Футболга муваффақиятлар тилайман. Қирғизистонда футбол бизнес сифатида қаралиши мумкин бўлган нарса эмас. Мен ўз вазифамни бажардим. Ўйлайманки, сизларнинг олдингизда раис сифатида охирги марта сўзга чиқяпман. Энди бу ерга ҳақиқатан ҳам футболни яхши кўрадиган одам келиши керак”, дейди у. 

Қамчибек Ташиев бу лавозимда икки йилдан ортиқ ишлаган. Бугунги конгрессда у қилинган ишлар ҳақида ҳисобот берди. 

Қирғизистон футбол иттифоқи сайлов қўмитаси раиси Мурат Осмоновнинг айтишича, номзодлар йўқлиги сабабли ҚФУнинг янги президенти сайловини ўтказиш масаласи кун тартибидан олиб ташланган.

Эслатиб ўтамиз, жорий йил 10 февраль куни Қирғизистон Президенти Садир Жапаров Қамчибек Ташиевни Миллий хавфсизлик давлат қўмитаси раиси лавозимидан озод қилган эди. Ўшандан бери МҚХБнинг бир қатор собиқ юқори мартабали раҳбарлари қўлга олинди, айримлари эса ишдан бўшатилди. Жўғўрқу Кенешнинг тўққиз нафар депутати, жумладан Қамчибек Ташиевнинг укаси Шоирбек Ташиев мандатини топширди. Кейинроқ у “Қирғизнефтгаз” корхонаси фаолияти билан боғлиқ коррупция айблови билан ҳибсга олинди. Махсус хизматнинг собиқ раҳбари ҳозирча сўнгги воқеаларга изоҳ бергани йўқ.