Путиннинг вертолёти дрон ҳужумига учради – ОАВ

Россия Президенти Владимир Путиннинг вертолёти Курск вилоятига учаётганида Украина дронларининг кенг кўламли ҳужумига учради. Бу ҳақда “Россия” телеканали эфирида ҳаво ҳужумидан мудофаа бўлинмаси қўмондони Юрий Дашкин маълум қилди.

Дашкиннинг сўзларига кўра, Путиннинг Курск вилоятига ташрифи чоғида украиналик ҳарбийлар “учувчисиз учиш аппаратлари билан мисли кўрилмаган ҳужум” уюштирган.

“Биз бир вақтнинг ўзида ҳаво ҳужумига қарши кураш олиб бордик ва Президент вертолётининг ҳавода хавфсизлигини таъминладик. Вертолёт аслида душман дронларининг йирик ҳужумини қайтариш эпицентрида эди”, деди Дашкин.

Унинг таъкидлашича, жами 46 та самолёт типидаги дрон йўқ қилинган.

Россия Президенти Владимир Путин жорий йилнинг 20 май куни Курск вилоятига ташриф буюриб, гуманитар штабда кўнгиллилар билан учрашди. Бундан ташқари, Путин маҳаллий ҳокимият раҳбарлари билан йиғилиш ўтказган, шунингдек, вилоят губернатори вазифасини бажарувчи Александр Хинштейн билан учрашган ҳамда Курсчатов шаҳридаги қурилаётган Курск АЭС-2 объектини кўздан кечирган. 

Эслатиб ўтамиз, Путин Курск вилоятига охирги марта жорий йилнинг 12 март куни борган эди. Ўшанда у ҳарбий кийимда Курск ҳарбий гуруҳ бошқарув пунктларидан бирида йиғилиш ўтказган. Йиғилишда Россия Бош штаби бошлиғи Валерий Герасимов вилоятда Украина қуролли кучларининг қуршаб олингани ҳақида ҳисобот берганди.

Украина қуролли кучлари Курск вилоятига ҳужумни ўтган йили 6 август куни бошлаган эди. Бир неча кундан сўнг ўша пайтдаги вилоят раҳбари Алексей Смирнов украиналик ҳарбийлар назоратига 28 та аҳоли пункти ўтганини, тахминан 180 минг киши эвакуация қилинганини, шулардан 121 минг нафари ўз ихтиёри билан кетганини маълум қилган.

Ҳарбий ҳаракатлар давомида Россия Мудофаа вазирлиги 59 аҳоли пункти, жумладан, украиналиклар томонидан ягона эгалланган шаҳар – Суджани озод этилганини билдирган. Жорий йил 26 апрель куни вазирлик Украина қуролли кучлари вилоятдан тўлиқ сиқиб чиқарилганини эълон қилган. Герасимов бу борадаги ёрдам учун Шимолий Корея ҳарбийларига миннатдорлик билдирган.