Путин бир йил ичида иккинчи марта Курскка борди

Россия Президенти Владимир Путин кеча, 20 май куни Курск вилоятига ташриф буюриб, гуманитар штабда кўнгиллилар билан учрашди. Бу ҳақда Кремль матбуот хизмати хабар берди.

“Анчадан бери сизнинг олдингизга келишни, ишларингиз ҳақида суҳбатлашишни, сизларга миннатдорлик билдиришни, бу ишлар қандай ташкил этилганини билишни ва табиийки, шундай ҳолатларда туғиладиган саволни – яна қандай ёрдам кераклиги, қандай қўллаб-қувватлаш лозимлигини сўрашни истагандим”, деган у учрашув аввалида.

Бундан ташқари, Путин маҳаллий ҳокимият раҳбарлари билан йиғилиш ўтказган, шунингдек, вилоят губернатори вазифасини бажарувчи Александр Хинштейн билан учрашган ҳамда Курсчатов шаҳридаги қурилаётган Курск АЭС-2 объектини кўздан кечирган.

Хинштейн Президентдан чегарадош ҳудудлардан мажбуран эвакуация қилинган аҳоли учун ҳар ойлик 65 минг рубль миқдоридаги тўловларни “ҳеч бўлмаганда одамлар ўз уйларига қайтиш имконига эга бўлгунларига қадар” узайтиришни сўраган. Унинг таъкидлашича, ҳозирда ҳудудларни миналардан тозалаш ишлари давом этмоқда. Вилоят раҳбари, шунингдек, яшаш учун яроқсиз ҳолга келган уй-жойларни таъмирлаш учун федерал бюджетдан ёрдам чораларини кўришни ҳам сўраган.

Эслатиб ўтамиз, Путин Курск вилоятига охирги марта жорий йилнинг 12 март куни борган эди. Ўшанда у ҳарбий кийимда Курск ҳарбий гуруҳ бошқарув пунктларидан бирида йиғилиш ўтказган. Йиғилишда Россия Бош штаби бошлиғи Валерий Герасимов вилоятда Украина қуролли кучларининг қуршаб олингани ҳақида ҳисобот берганди.

Украина қуролли кучлари Курск вилоятига ҳужумни ўтган йили 6 август куни бошлаган эди. Бир неча кундан сўнг ўша пайтдаги вилоят раҳбари Алексей Смирнов украиналик ҳарбийлар назоратига 28 та аҳоли пункти ўтганини, тахминан 180 минг киши эвакуация қилинганини, шулардан 121 минг нафари ўз ихтиёри билан кетганини маълум қилган.

Ҳарбий ҳаракатлар давомида Россия Мудофаа вазирлиги 59 аҳоли пункти, жумладан, украиналиклар томонидан ягона эгалланган шаҳар – Суджани озод этилганини билдирган. Жорий йил 26 апрель куни вазирлик Украина қуролли кучлари вилоятдан тўлиқ сиқиб чиқарилганини эълон қилган. Герасимов бу борадаги ёрдам учун Шимолий Корея ҳарбийларига миннатдорлик билдирган.