Путин Зеленский билан учрашишга рози бўлди – Рубио

Россия Президенти Владимир Путин Украина етакчиси Владимир Зеленский билан учрашишга тайёрлигини маълум қилди. Бу ҳақда АҚШ Давлат котиби Марко Рубио кеча, 18 август куни “Fox News” телеканалига берган интервьюсида айтиб ўтди.  

Унинг сўзларига кўра, айни пайтда Россия ва Украина раҳбарларининг учрашувини ташкил этиш бўйича ишлар олиб борилмоқда. Рубио таъкидлаганидек, агар муваффақиятли бўлса, кейинги босқич уч томонлама музокаралар бўлиб, унда Путин ва Зеленскийдан ташқари АҚШ Президенти Дональд Трамп ҳам иштирок этади.

“Путиннинг “Яхши, мен Зеленский билан учрашаман” дегани катта воқеа”, деди Рубио.

Эслатиб ўтамиз, аввалроқ Россия Президенти Владимир Путин ва Украина Президенти Владимир Зеленский ўртасидаги музокаралар Венгрияда ўтказилиши мумкинлиги хабар қилинганди. Дам олиш кунларида “кўнгиллилар коалицияси”нинг видеоконференциясида Италия Бош вазири Жоржия Мелони учрашув жойи сифатида Римни, Франция Президенти Эммануэль Макрон эса Женевани таклиф қилган.

Маълумки, Зеленский ва Трамп Римни, яъни Ватиканни афзал кўради, Путин эса Женевани.

Италия ва Швейцария Ташқи ишлар вазирликлари музокараларга мезбонлик қилишга тайёр эканини таъкидламоқда ва Европа Иттифоқи дипломатлари бошқа жойлар, жумладан Будапешт ва Хельсинкини ҳам кўриб чиқмоқда.