Путин ва Зеленский Венгрияда учрашиши мумкин

Россия Президенти Владимир Путин ва Украина Президенти Владимир Зеленский ўртасидаги музокаралар Венгрияда ўтказилиши мумкин. Бу ҳақда АҚШ Президенти маъмуриятидаги юқори лавозимли манбага таяниб, “Reuters” хабар берди.

Нашрнинг ёзишича, манба батафсил тафсилотларни очиқламаган, фақат Россия томони ҳозирча бундай учрашувга расмий розилик бергани ҳақида эълон қилмаганини билдирган.

Бундан ташқари, Франция Президенти Эммануэль Макрон LCI телеканалига берган интервьюсида Путин ва Зеленский учрашуви учун Швейцариянинг Женева шаҳрини танлаш тарафдори эканини айтган.

“Бу нейтрал давлат бўлади, мен Швейцария – Женевани илгари сураяпман ёки бошқа бир давлат”, дейди у.

Эслатиб ўтамиз, кеча, 18 август куни АҚШ Президенти Дональд Трамп Украина Президенти ва Европа етакчилари билан учрашувдан сўнг Владимир Путин ва Владимир Зеленскийнинг шахсий учрашувига тайёргарлик кўрилаётганини маълум қилган эди.

Германия канцлери Фридрих Мерц эса Оқ уйда бўлиб ўтган музокараларда иштирок этиб, Путин ва Зеленский учрашувини яқин икки ҳафта ичида ўтказиш режалаштирилаётганини билдирган.

Венгрия Бош вазири Виктор Орбан эса Россия билан ҳамкорликни давом эттириш тарафдори бўлиб, Украинага ҳарбий ёрдам беришга қарши чиқмоқда. Орбан бунгача Москвага бориб Путин билан учрашган, шунингдек Киевга ҳам ташриф буюриб, Зеленский билан музокаралар ўтказганди.