Путин, Трамп ва Зеленский учрашадиган тахминий ҳудудлар айтилди

Бугун, 18 август куни Оқ уйда Украина Президенти Владимир Зеленский ва АҚШ раҳбари Дональд Трамп ўртасида бўлиб ўтадиган учрашув ижобий якунланса, Россия Президенти Владимир Путин билан бўладиган 3 томонлама учрашув жорий йилнинг 22 август куни Европада бўлиб ўтиши мумкин. Бу ҳақда “Sky News” хабар берди.

Телеканал маълумотларига кўра, Трамп ва Зеленский ҳамда Европа етакчилари билан Вашингтондаги бугунги учрашув яхши тугалланса, америкалик дипломатлар европалик мавқедошларидан шу ҳафта охирида Трамп, Зеленский ва Путин ўртасидаги уч томонлама учрашувга тайёр бўлишни сўраган.

АҚШ ва унинг Европа Иттифоқидаги иттифоқчилари учрашув Европада ўтказилишига келишиб олган.

Дам олиш кунларида “кўнгиллилар коалицияси”нинг видеоконференциясида Италия Бош вазири Жоржия Мелони учрашув жойи сифатида Римни, Франция Президенти Эммануэль Макрон эса Женевани таклиф қилган.

Маълумки, Зеленский ва Трамп Римни, яъни Ватиканни афзал кўради, Путин эса Женевани.

Италия ва Швейцария Ташқи ишлар вазирликлари музокараларга мезбонлик қилишга тайёр эканини таъкидламоқда ва Европа Иттифоқи дипломатлари бошқа жойлар, жумладан Будапешт ва Хельсинкини ҳам кўриб чиқмоқда.

Аммо қайд этиш жоизки, бу учрашувнинг ўтказилиши Зеленский ва Трампнинг Вашингтондаги бугунги учрашуви қандай ўтишига боғлиқ бўлади.

Эслатиб ўтамиз, аввалроқ АҚШ Президентининг махсус элчиси Стив Уиткофф Россия Президенти Владимир Путин АҚШ ва Европанинг Украинага қарши янги босқин содир этилган тақдирда уни биргаликда ҳимоя қилишини назарда тутувчи хавфсизлик кафолатларини “мустаҳкам” шаклда таъминлашга розилик берганини айтганди.