Путин ва Трамп Римда учрашади – “Fox News”

Россия Президенти Владимир Путин ва АҚШ Президенти Дональд Трампнинг учрашуви 11 август куни Римда бўлиб ўтиши режалаштирилган. Бу ҳақда ўз манбаларига таяниб, “Fox News” хабар берди.

Россия Президентининг ёрдамчиси Юрий Ушаков учрашув жойи аллақачон келишилганини, аммо ҳозирча ошкор этилмаслигини билдирган. Бунгача Владимир Путин учрашувни БАА ҳудудида ўтказиш эҳтимоли ҳақида ҳам айтганди.

Нашрнинг ушбу хабари ҳам ҳозирча расман тасдиғини топмаган. На Оқ уй, на Кремль бу учрашув Римда режалаштирилгани ва айнан қачон бўлиши ҳақида ҳозирча расмий баёнот бермади, лекин Ушаков учрашув келаси ҳафтага режалаштирилганини билдирган. 

Қайд этиш жоиз, бу учрашувга Украина Президенти Владимир Зеленский ҳам қўшилиши мумкин. 6 август куни Кремлда ўтказилган музокараларда АҚШ Президентининг Яқин Шарқ бўйича махсус вакили Стив Уиткофф Путин, Трамп ва Украина Президенти Владимир Зеленский ўртасида уч томонлама учрашув ўтказиш ғоясини илгари сурган. Путин эса Зеленский билан учрашув ўтказишга қарши эмаслигини билдирганди, бироқ бунинг учун муайян шарт-шароитлар бўлиши кераклигини таъкидлаган. Путиннинг сўзларига кўра, у Зеленский билан учрашувга “умуман қарши эмас” ва бундай учрашув “кутилиши мумкин”, аммо бунинг учун “муайян шартлар яратилиши керак”. Айни пайтда эса “бу шартларнинг амалга ошишига ҳали анча вақт бор”.

Эслатиб ўтамиз, аввалроқ “New York Post” нашри Путин Украина Президенти Владимир Зеленский билан музокараларга рози бўлгандагина, Дональд Трамп ва Владимир Путин ўртасида учрашув бўлиши ҳақида ёзганди. Яъни, аввал у Украина раҳбари билан келишиб олиши лозим. Бироқ Трамп буни рад этди.