Путин ва Лукашенко Украина урушини муҳокама қилди

Россия Президенти Владимир Путин ва Беларусь резиденти Александр Лукашенко кеча, 26 июнь куни асосий эътибор Украинадаги уруш билан боғлиқ масалаларга қаратилган музокара ўтказди. Бу ҳақда Кремль хабар қилди.

Россиянинг шимоли-ғарбида жойлашган Валдай қароргоҳида бўлиб ўтган учрашувда савдо-иқтисодий ҳамкорлик, қўшма лойиҳаларни амалга ошириш ҳамда минтақавий хавфсизлик масалалари муҳокама қилинган. Кремль матбуот котиби Дмитрий Песков ТАСС агентлигига музокаралар якунлари бўйича матбуот анжумани ўтказилмаслиги ва ҳеч қандай ҳужжат имзоланмаслигини билдирган.

Учрашув Беларусь ва Украина ўртасидаги муносабатлар янада таранглашган бир пайтда бўлиб ўтган. Украина Президенти Владимир Зеленскийнинг фикрича, Путин Лукашенкони Россияга Украинадаги урушда янада фаолроқ ёрдам беришга ундамоқда. Москва ва Минск бу даъвони рад этган. Беларусь расмийлари эса аксинча, кескинликни Украина ва Ғарб давлатлари кучайтираётганини таъкидлаган.

Лукашенко 25 июнь куни Зеленский вакиллари билан учрашганини маълум қилиб, уларни Беларусни урушга тортишга уринмаслик ҳақида огоҳлантирганини айтганди. Кремль эса Украина Беларусь суверенитетига таҳдид солаётганини иддао қилган. Кремль 22 июнь куни Путин ва Лукашенко Зеленскийнинг ушбу баёнотларини “яқин келажакда” муҳокама қилишини билдирган.

Эслатиб ўтамиз, аввалроқ Россия Президенти Владимир Путин Ғарб давлатлари олиб бораётган сиёсатни қаттиқ танқид қилиб, Европани бошқа давлатларнинг ички масалаларига аралашганликда айблаган эди.