Путин Россиянинг НАТОга киришга уринишлари нега рад этилганини айтди

Дастлаб СССР, кейин эса Россия икки марта НАТОга кириш истагини билдирган. Бу ҳақда Россия Президенти Владимир Путин бугун, 2 октябрь куни Сочида бўлиб ўтган “Валдай” халқаро мунозара клубининг 22 йиллик йиғилишининг ялпи мажлисида айтди.

Давлат раҳбарининг сўзларига кўра, берилган ҳар икки таклиф ҳам рад этилган.

“Мамлакатимиз икки марта НАТОга киришга тайёрлигини маълум қилди. Биз биргаликда ишлашга, хавфсизлик ва глобал барқарорлик соҳасида бирга қадамлар ташлашга тайёр эдик. Аммо ғарблик мавқедошларимиз ўзларини геосиёсий ва тарихий стереотиплар чангалидан, дунёнинг соддалаштирилган, схематик тасвиридан халос бўлишни истамаслигини исботлади”, деди Путин.

Россия етакчиси биринчи уринишлар 1954 йилда, кейин эса 2000 йилда АҚШ Президенти Билл Клинтон ташрифи чоғида амалга оширилганини таъкидлади. Унинг таъкидлашича, ҳар иккала уриниш ҳам рад жавоб билан якунланган.

Унинг айтишича, ўша вақтда халқаро муносабатларни ривожлантиришда бошқача, ижобий йўналиш учун реал имконият бор эди.

“Аммо, афсуски, бошқача ёндашув устун келди. Ғарб давлатлари мутлақ ҳокимият васвасасига бўйсунди”, дея таъкидлади у.

Эслатиб ўтамиз, аввалроқ Европа дипломатлари Кремлни НАТО ҳаво ҳудудининг кейинги бузилишига кескин жавоб беришга, жумладан, Россия самолётларини уриб туширишга тайёрлиги ҳақида огоҳлантирганди.