Путин қирувчи самолётлар уни Туркияга кузатиб боришини истайди – ОАВ

Россия Президенти Владимир Путин Туркияга ташрифида уни ўз мамлакатининг қирувчи самолётлари кузатиб қўйишини хоҳлайди. Бу ҳақда “Middle East Eye” ёзмоқда.

2023 йилдан бери Владимир Путин Туркияга бир неча расмий ташрифларини кейинга қолдирди. Расмийлар кўп сабабларни келтирди. Айримларнинг айтишича, Путин Украинада ҳарбий ҳаракатлар бошланганидан бери собиқ Совет Иттифоқидан ташқаридаги давлатлардан қочиб келади. Бошқалар буни 2024 йилнинг бошида бўлиб ўтган Россия сайловлари билан боғлайди. Бироқ, “Middle East Eye” манбаларига таяниб хабар беришича, доимий кечикишларнинг асосий сабаби Путиннинг Анқарага ташрифи учун илгари сурилган шартлардир.

“Путин Туркияга Россия қирувчи самолётлари ҳамроҳлигида учишни истайди, эҳтимол Украинанинг парвоз йўналиши бўйича самолётларни уриб тушира олишидан хавотирда”, дейилади хабарда.

Москванинг Россия қирувчи самолётларида учиш ва уларни Туркия тупроғига қўндириш талаби мураккаб масала, чунки мамлакатнинг НАТО ҳаво мудофаа тизимлари бундай самолётларни душман нишони сифатида қабул қилиши мумкин.

“Туркия Россия талабини бажариш учун ҳаво ҳужумидан мудофаа тизимларини ёпиб қўйиши даргумон”, деган манбалардан бири.

Нашрга кўра, ташриф бўйича сўнгги мулоқотларда Россия ва Туркия расмийлари Путиннинг жорий йилнинг октябрь ойи биринчи ҳафтасида келишини муҳокама қилган, бироқ “махсус талаблар” сафарни режалаштириш ва ташкил этишни қийинлаштиради. Путин Анқарага охирги марта 2014 йилда ташриф буюрган эди.

Исмини ошкор этмаган собиқ Туркия элчисининг сўзларига кўра, Туркия ишора сифатида хорижий давлат раҳбарларини кузатиб бориш учун қирувчи самолётларини юбориши мумкин. Бироқ, у хорижий давлатлар раҳбарлари ўз мамлакатларининг қирувчи самолётлари ҳамроҳлигида келишни хоҳлаган бирорта ташрифини эслай олмайди. Яна бир манбанинг қўшимча қилишича, бу борада алоҳида протокол йўқ.

“Бироқ Россия талаблари фақат қирувчи самолётлар билан чекланмайди”, деб ёзади нашр.

Россия расмийлари, шунингдек, Анқарадаги учта энг йирик меҳмонхона мажмуалари – “Hilton”, “Sheraton” вa “JW Marriott”  Америка компанияларига тегишли эканлигидан шикоят қилмоқда. Манбаларга кўра, Москва Америка меҳмонхоналар тармоғини Россия давлат раҳбари учун хавфли деб ҳисоблайди.

“Бу Анқара Путинни қабул қилиш учун ҳукумат меҳмонни уй билан таъминлаши эҳтимолини оширади, бу сўнгги пайтларда мисли кўрилмаган жуда ноодатий протокол”, дея ёзган нашр.

2023 йили МEE манбалари Путиннинг хавфсизлик муаммолари Анқарага ташрифини кечиктиришда роль ўйнаган бўлиши мумкинлигини билдирди. Уларнинг сўзларига кўра, Туркия НАТО аъзоси бўлгани учун Россия расмийлари, айниқса унинг ёки унинг атрофидагилар ҳаётига суиқасдлар содир этилишидан хавотирда.

Бир қарашда Россиянинг меҳмонхоналар тармоғи ҳақидаги хавотирлари ўринли бўлиб туюлиши мумкин, аммо Путин Туркияга бор-йўғи бир кунга ташриф буюрса, меҳмонхонада қолиши шарт эмас.

Маълумот учун, Россия Президенти Владимир Путин ва Туркия Президенти Ражаб Тойиб Эрдўғаннинг охирги учрашуви 2023 йил 4 сентябрь куни Сочида бўлиб ўтган.

Эслатиб ўтамиз, жорий йилнинг январь ойида Кремль воизи Дмитрий Песков Путиннинг Туркияга ташрифи яқин ойларда амалга ошишини билдирганди.