Пентагон раҳбари шифохонага тушиб қолди 

АҚШ Мудофаа вазири Ллойд Остин соғлиғидаги муаммо туфайли 1 январдан бери шифохонада ётибди. Бу ҳақда кеча, 5 январь куни Пентагон ахборот хизмати маълум қилди.

Вазирнинг шифохонага тушиб қолиши сабаби очиқланмади ва унинг саломатлиги ёмонлашгани ҳафта бўйи нега сир сақлангани номаълумлигича қолмоқда. 

70 ёшли Остин АҚШ армиясида Президент Жо Байдендан кейин иккинчи қўмондон бўлиб, унинг масъулияти миллий хавфсизлик инқирози юз берган тақдирда дарҳол тайёр бўлишини талаб қилади.

Пентагон Остиннинг 1 январь куни Валтер Рид Миллий ҳарбий тиббиёт марказига ётқизилишидан олдин ёки ундан кейин ҳушини йўқотгани ёки йўқлигига аниқлик киритмади. Вазир ўринбосари Кэтлин Хикс унинг вазифаларини қай даражада ўз зиммасига олгани ҳам номаълум. 

Пентагон баёнотида айтилишича, Остин "яқин орада олган тиббий муолажа асоратларини" бошдан кечирмоқда. Шу билан бирга, ҳарбий идора қандай муолажа ҳақида гап кетаётгани ҳақида маълумот бермади.

"У тузалиб кетди ва бугун тўлиқ хизматга қайтиши кутилмоқда", деган Пентагон матбуот котиби Патрик Райдер.

Журналистлар Уюшмаси ҳарбий амалдорларга йўллаган мактубида Мудофаа вазирлигининг махфийлигини қоралади. Уларнинг фикрича, Остин жамоат арбоби бўлиб, бундай вазиятда унинг соғлиғи ҳақидаги маълумотларнинг сир сақланиши тўғри эмас.

“Яқин Шарқда америкалик ҳарбий хизматчиларга таҳдид кучаяётган ва Қўшма Штатлар Исроил ва Украинадаги урушларда миллий хавфсизликни таъминлашда муҳим роль ўйнаган бир пайтда, Америка жамоатчилиги мудофаа бўлими бошлиғининг соғлиғи ва унинг қарор қабул қилиш қобилияти ҳақида хабардор бўлиши жуда муҳим", дейилади мактубда.

Мактубда таъкидланишича, ҳатто АҚШ президентлари ҳам тиббий муолажалар туфайли ўз масъулиятини топширишлари керак бўлганда ҳисобот беришади.