Париждаги тўполонда Мессининг футболкаси ўғирланди

Франция пойтахти Парижда юз берган тартибсизликлар вақтида аргентиналик футбол юлдузи Лионель Месси имзолаган “Барселона” футболкаси ва у фойдаланган сардорлик боғичи ўғирланди. Бу ҳақда “Noticias Argentinas” агентлиги маълум қилди.

Агентлик маълумотларига кўра, жорий йилнинг 17 октябрь куни юзларини ниқоб билан беркитган шахслар музейга бостириб кириб, Мессининг “Барселона”даги фаолияти даврига тегишли футболка ва сардорлик боғичини олиб кетган.

Бироқ музейнинг номи, буюмларнинг қиймати ва Месси улардан қайси учрашувларда фойдалангани ҳақида маълумот берилмаган.

Шунингдек, Франциянинг “Cpasdeslol” ахборот саҳифаси “X” ижтимоий тармоғида Зинедин Зиданнинг исми ва дастхати туширилган “Реал Мадрид” футболкаси акс этган видеони эълон қилди. Пост муаллифи мазкур буюм ҳам тартибсизликлар вақтида ўғирланганини даъво қилган. Ҳодисанинг бошқа тафсилотлари очиқланмаган.

Маълумот учун, жорий йилнинг 17 октябрь куни Франциянинг бир қатор ҳудудларида турмуш харажатларининг юқорилиги ва таълим тизимидаги муаммоларга қарши оммавий намойишлар бўлиб ўтган. Айрим жойларда норозиликлар ҳуқуқ-тартибот идоралари билан тўқнашувларга ва тартибсизликларга айланган.

“Le Monde” нашри келтирган маълумотларга кўра, дам олиш кунлари мамлакат бўйлаб тахминан 2 400 киши ҳибсга олинган, 997 нафар полиция ходими, жандарм ва ўт ўчирувчи жароҳатланган. Франция президенти Эммануэль Макрон тинч намойишчиларнинг талабларида қонуний асослар бўлиши мумкинлигини тан олган ҳолда, тартибсизликларда иштирок этган шахслар жавобгарликка тортилишини билдирган.

Эслатиб ўтамиз, аввалроқ Марсель шаҳрида талончилар “Олимпик Марсель” футбол клубининг расмий дўконига бостириб кириб, уни талон-торож қилгани ҳақида хабар берилганди.