Оқ уйда ва бошқа жойларда Америка байроғи яримга туширилди

Ижтимоий тармоқларда АҚШнинг ҳукумат идораларида, шунингдек Оқ уйда мамлакат байроғи ярмигача туширилгани акс этган суратлар тарқалди. Бу суратлар айниқса Қўшма Штатлар Президенти Дональд Трампнинг “вафот этгани” ҳақидаги миш-мишлар тарқалган бир пайтда кўп тарқала бошлади.

АҚШ раҳбари Трамп Миннеаполисдаги католик мактаби ва черковидаги отишма қурбонлари хотирасига 27 август кунидан 31 август куни охиригача ҳукумат биноларида байроқларни ярмигача туширишни буюрди.

Унга кўра, АҚШнинг барча элчихоналари, ваколатхоналари, консуллик муассасалари ва хориждаги бошқа объектлари, жумладан, барча ҳарбий қисмлар, ҳарбий-денгиз кемалари ва станцияларда бир хил муддатда АҚШ байроғи ярмига туширилган ҳолатда ҳилпиратилади.

“2025 йилнинг 27 августида Миннесота штатининг Миннеаполис шаҳрида содир этилган бемаъни зўравонлик қурбонлари шарафига Оқ уйда, барча жамоат бинолари ва майдонларида, барча ҳарбий постлар ва ҳарбий-денгиз базаларида, шунингдек, Америка Қўшма Штатлари федерал округи ва унинг бутун Колумбия округидаги денгиз флотида АҚШ байроғини ярим ҳолатда ҳилпиратилишини буюраман. Ушбу жараён 31 август куни қуёш ботгунига қадар давом этади”, дейилади Трампнинг буйруғида.

Маълумот учун, 27 август куни эрталаб Миннесота штатининг Миннеаполис шаҳридаги католик мактаби ва черковида отишма содир бўлиб, икки киши ҳалок бўлди, 17 киши, жумладан, 14 бола яраланди. Отишма 20 ёшли Робин Уэстман экани аниқланди. Полициянинг айтишича, у ўз жонига қасд қилган.

Мамлакат байроғи ярмига туширилгани Трампнинг “ҳақиқатдан ҳам вафот этгани” бўйича 30 август куни тарқалган гап-сўзлар оқимини янада кучайтирди. Аммо Трамп тирик, унинг соғлиги жойида. Буни исмини ошкор этмаган АҚШ расмийси “Axios” нашри журналисти Барак Равидга маълум қилган.

У Оқ уй матбуот уйида Трамп кортежи жўнашдан олдин оқ поло кўйлак ва қизил Make America Great Again  қалпоқ кийган ҳолда тасвирлангани ҳақидаги хабарларнинг скриншотларини жойлаштирди.

Яқинда Трамп соғлиғи билан боғлиқ муаммоларга дуч келганди. Июль ойида Оқ уй унинг оёқлари шишишига олиб келадиган сурункали веноз етишмовчилик, деб номланувчи қон-томир касаллиги борлигини тасдиқлади. Вазият томирлардаги босимнинг ошишига олиб келади ва шиш пайдо бўлишига, шунингдек, ошқозон ярасига олиб келиши мумкин, аммо бу ҳаёт учун хавфли эмас деб баҳоланган. Трампнинг аҳволи расмий каналлар орқали эълон қилинишидан аввал ижтимоий тармоқларда тарқатилган суратларда унинг оёқлари шишиб кетгани кўриниб, соғлиғи ҳақида тахминлар пайдо бўлганди.

Эслатиб ўтамиз, аввалроқ Трампнинг касали авж олгани ҳақида хабар берилганди. “The Daily Beast”нинг ёзишича, АҚШ Президенти Дональд Трампнинг қўлида кўкаришлар пайдо бўлган ва Оқ уй раҳбари бунинг ортидан қўлига крем суркаб олган. 79 ёшли давлат раҳбари яна ўз лавозимига киришганидан бери у бир неча бор ўнг қўлидаги кўкаришларни косметика воситаси билан яширишга мажбур бўлмоқда.