Мужтабосиз ўтаётган мотам: Янги олий раҳнамо отасининг жанозасида қатнашмаяпти (видео)

Эроннинг ҳалок бўлган олий раҳбари, оятуллоҳ Али Хоманаийнинг уч ўғли – Мустафо, Майсам ва Масъуд Хоманаий кеча, 5 июль куни Теҳронда ўтказилган жаноза маросимида отаси ҳамда у билан бирга ҳалок бўлган яна тўрт нафар оила аъзосининг тобутлари ёнида жаноза намозида иштирок этди. Бироқ Хоманаийдан кейин олий раҳбарлик лавозимини эгаллаган ўғли Мужтабо Хоманаий маросимда кўриниш бермади. Бу ҳақда маҳаллий телеканаллар хабар берган.

Давлат телеканаллари тарқатган лавҳаларда Мустафо, Майсам ва Масъуд Хоманаий Теҳрондаги Имом Хумайний номидаги катта “Мусалла” мажмуасида қатор қўйилган тобутлар ортида дуо қилаётгани акс этган.

Маълум қилинишича, ўн минглаб мотам тутувчилар, жумладан ҳарбийлар, диний талабалар ҳамда оддий фуқаролар “Мусалла” мажмуасига келиб, Хоманаий ва унинг оиласи хотирасига эҳтиром билдирган. Улар АҚШ ва Исроилдан қасос олиш ҳақидаги шиорлар туширилган байроқларни кўтариб чиққан. Бошқалар эса Эроннинг биринчи олий раҳбари Руҳуллоҳ Хумайний номи билан аталган мажмуада жамоавий дуолар қилган.

28 февралдаги ҳужумда жароҳат олгани айтилган Мужтабо Хоманаий шу пайтгача омма олдига чиқмаган ва унинг янги суратлари ҳам эълон қилинмаган. “Reuters” агентлигига унинг яқин атрофидаги манбаларнинг айтишича, Мужтабо Хоманаийнинг юзи шикастланган ва у бир ёки икки оёғидан оғир жароҳат олган.

“Намоз бошлангунига қадар атрофдагиларга Мужтабо Хоманаийнинг ўзи келишига умид қилаётганимни айтаверардим. Бу бизнинг ягона истагимиз эди”, деган “Тасним” агентлиги суҳбатлашган бир аёл мотам иштирокчиси.

Шунингдек, Эрон Президенти Масъуд Пезешкиён ва парламент спикери Муҳаммад Бағир Ғолибоф ҳам тобутлар ортида жаноза намозида иштирок этган. Масъуд Хоманаий кўз ёшларини фаластинликлар билан ҳамжиҳатлик рамзи ҳисобланган куфия рўмоли билан артаётгани кўринган.

Қайд этилишича, марказий Теҳронга минглаб одамлар оқиб келмоқда. Уларнинг айримлари йиғлаган, бошқалари эса кўкрагига уриб аза тутган. Эрон метрополитени маълумотига кўра, 5 июль кечасидан 6 июль эрталабигача 7 миллион йўловчи ташилган.

Эрон давлат ОАВ хабар беришича, эртага, 7 июль куни Теҳрон марказида катта мотам юриши ўтказилади. Шундан кейин Хоманаийнинг жасади Қум шаҳрига олиб борилади ва 8 июль куни у ерда маросимлар давом этади. Жасад махсус транспорт воситасида қуруқлик орқали ташилади. Кейин у Ироқнинг Нажаф ва Карбало шаҳарларидаги шиа зиёратгоҳларига олиб борилади. 10 июль куни эса Машҳад шаҳрида яна бир мотам маросими ўтказилиб, Хоманаий Имом Ризо мақбараси яқинига дафн этилади.

Маълумот ўрнида, Али Хоманаий жорий йил 28 февралда АҚШ ва Исроилнинг Эронга қарши урушни бошлаган илк ҳаво ҳужуми вақтида бир нечта оила аъзоси билан бирга ҳалок бўлган. Бир неча ҳафта давом этган можаро ортидан томонлар мустаҳкам бўлмаган ўт очишни тўхтатиш келишувига эришган бўлса-да, уруш минтақада катта вайронагарчилик ва кўплаб қурбонларга сабаб бўлди.

Кеча, 5 июль куни давлат раҳбарлари ва хорижий меҳмонлар учун ёпиқ видолашув маросими ўтказилганидан сўнг, Хоманаийнинг тобути шиша қоплама остида омма учун намойиш этилган. Унинг қизи, куёви, келини ва 14 ойлик набирасининг тобутлари ҳам ёнма-ён қўйилган.

Эслатиб ўтамиз, аввалроқ Эронда мамлакатнинг собиқ олий раҳбари Али Хоманаийнинг бир неча кун давом этадиган дафн маросими бошлангани хабар берилган ва жараёндан  фоторепортаж тақдим этилганди.