“Miss Universe” танловида жанжал чиқди (видео)

Жорий йил дунёнинг энг гўзал қизлари танлови Таиландда ўтказилмоқда. Кеча, 5 ноябрь куни “Miss Universe 2025” – 74-халқаро гўзаллик танловининг тантанали кутиб олиш маросими бўлиб ўтди. Унда тадбир вице-президенти Мексика вакиласини “аҳмоқ” деб атади ва бунга жавобан бир нечта иштирокчилар залдан чиқиб кетди. Бу ҳақда “International Business Times” хабар берди.

Қайд этилишича, Бангкокдаги меҳмонхонада иштирокчилар яшаётган жойда тартибсизлик бошланган. Бунинг сабаби танловнинг юқори лавозимли вакили “Miss Mexico” Мелиссе Флорес Бошни омма олдида ҳақоратлагани бўлган. Бу эса бошқа қизларнинг норозилигини келтириб чиқарган.

Воқеа жонли эфир вақтида содир бўлган. “Miss Universe” танловининг Осиё ва Океания бўйича вице-президенти Нават Ицарагрисил ҳомийлик фотосессиясида қатнашмагани учун Мелиссега мурожаат қилиб, камералар олдида тушунтириш беришни талаб қилган. Қиз эса буни истамаслигини айтгач, Нават уни гапини бўлиб “аҳмоқ”, дея атаган ва хавфсизлик ходимларига уни чиқариб юборишни буюрган. Мелиссе зални тарк этган, ортидан эса 2024 йилги “Miss Universe” ғолиби Виктория Кьер Тейлвиг ҳам туриб, тадбирдан кетишини эълон қилган. 

“Мен овозим эшитилишини истайман ва ундан қўрқмайман. XXI асрда яшаяпмиз. Мен бўянадиган, кийинтириладиган қўғирчоқ эмасман. Бу ерга барча аёллар ва қизлар номидан овоз кўтариш учун келдим. Мамлакатим билсин – мен бунга тўлиқ содиқман”, дейди Мексика вакили Мелиссе Флорес Бош. 

Эслатиб ўтамиз, аввалроқ чехиялик модель Натали Пушкинова 2025 йилги “Дунё гўзали” танловида мутлоқ ғолиб бўлган эди. Танловда жами 79 мамлакат вакиллари иштирок этган. Энг яхши кўриниш учун соврин Колумбияга, кечки либос кўриниши учун Куба вакилига берилган.

Моҳичеҳра Қадамова