Дунёнинг энг гўзал аёли аниқланди

Чехиялик модель Натали Пушкинова 2025 йилги “Дунё гўзали” танловида мутлоқ ғолиб бўлди. Танловнинг финал босқичи “Critical Beauty Philippines” канали томонидан эфирга узатилди.

Танлов кеча, 5 ноябрь куни Филиппин пойтахти Манила шаҳрида ўтказилган. Танловда “Ҳаво маликаси” номинациясини Исландиядан Соллис Вала Иварсдоттир қўлга киритган бўлса, “Сув маликаси” номинациясини Вьетнамдан Чин Ми Ан, “Олов маликаси” номинациясини эса Таиланддан Вари Нгамкҳам қўлга киритган. 

Танловда жами 79 мамлакат вакиллари иштирок этган. Энг яхши кўриниш учун соврин Колумбияга, кечки либос кўриниши учун Куба вакилига берилган.

Натали Пушкинова 21 ёшда. У Прага яқинида яшайди ва Карл университетида “Маркетинг коммуникациялари ва оммавий алоқалар” бўйича таҳсил олади. У модель сифатида ишлайди. 

Аввал Пушкинова анорекциядан азият чеккан. Модель агентлигида уни вазн йўқотишга мажбурлашган ва бу деярли ҳаётига хавф солган. 

Пушкинова шунингдек, машҳур шоир Александр Пушкин билан узоқ қариндош бўлиши мумкинлигини инкор этмайди. 

Маълумот учун, “Дунё гўзали” танлови дунёдаги энг йирик гўзаллик танловларидан бири бўлиб, “Miss Universe”, “Miss World” ва “Miss International” билан бир қаторда ўтказилади. Танлов 2001 йилдан бери ташкил этилади.

Танловнинг асосий мақсади – гўзаллик танловларини экология бўйича хабардорликни ошириш воситаси сифатида ривожлантириш. Иштирокчилар нафақат гўзалликда, балки экологик билимларда ҳам беллашади. Ғолиблар кейинчалик бутун дунё бўйлаб атроф-муҳитни ҳимоя қилиш элчилари сифатида фаолият юритади.

Эслатиб ўтамиз, аввалроқ турмуш қурган аёллар ўртасида ўтказилган 25-умумроссия гўзаллик танлови – “Миссис Россия – 2025” унвонига Магнитогорскда яшовчи 37 ёшли Екатерина Семенова сазовор бўлганди.