Мигрантлар ягона қоидаларга мувофиқ рус тилини билиш синовидан ўтиши керак – Путин

Россия Президенти Владимир Путин чет элликлар учун рус тилини билиш даражасини уларнинг иш билан таъминлашдаги ҳақиқий эҳтиёжларини ҳисобга олган ҳолда аниқлаш кераклигини айтди. Бу ҳақда мамлакат раҳбари бугун, 5 ноябрь куни рус тилини ва Россия халқларининг бошқа тилларини қўллаб-қувватлаш кенгашида сўз очди.

"Рус тилини билиш нуқтаи назаридан умумий қоидалар Россияга ишлаш учун келганлар учун ҳам зарурдир. Ижтимоий ва маданий хулқ-атвор нормаларимизнинг касбий талабларини ҳисобга олган ҳолда, уларни иш билан таъминлаш, кундалик ҳаётда мулоқот қилишнинг ҳақиқий эҳтиёжларини аниқлаб, тилни билиш даражасини мустаҳкамлаш керак", деди у.

Қолаверса, йиғилишда рус тилини яхши билмайдиган ташриф буюрувчиларнинг болалари билан ишлашнинг ягона федерал алгоритмини ишлаб чиқиш зарурлигини таъкидланган. Шунингдек, Президент Миллий луғат жамғармаси келгуси йилдан бошлаб даромад олишини ҳам маълум қилган. 

"Ушбу жуда талаб қилинадиган маълумотлар базасини яратиш тўғрисидаги қарор замонавий рус адабий тили қоидалари тўғрисида расмий билим манбасини шакллантириш зарурати билан белгиланади", деб тушунтирди Путин. 

Унинг таъкидлашича, бундай оммавий ресурс ўзларининг касбий ва ижтимоий фаолиятида сўз билан боғлиқ бўлган касб эгалари учун ҳам зарурдир.

Эслатиб ўтамиз, 31 октябрь куни Россия Хавфсизлик кенгаши раиси ўринбосари Дмитрий Медведев рус тилини билмайдиган муҳожирлар фарзандларини мактабга қабул қилишни тўхтатиш вақти келганини айтганди. Унинг бу чақириғига Ўзбекистон Олий Мажлиси Қонунчилик палатаси спикерининг ўринбосари Алишер Қодиров муносабат билдирганди. Қодировга кўра, болаларга қилинадиган бу шафқатсизлик келажакда рус тилига муносабатни шакллантиради.

Россиянинг Фан ва олий таълим вазирлиги мигрантлар учун рус тили, Россия тарихи ва қонунчилик асосларини билиш бўйича имтиҳон топширишнинг ягона нархини белгилашни таклиф қилди. Имтиҳонлар учун ягона нархнинг жорий этилиши Давлат думасининг жорий йилнинг 29 октябрь куни иккинчи ва учинчи ўқишда “Россия Федерациясида хорижий фуқароларнинг ҳуқуқий ҳолати тўғрисида”ги қонунга ўзгартиришлар қабул қилгани билан боғлиқ. Мазкур ўзгаришларга кўра, имтиҳонларни фақат давлат муассасалари қабул қилиши ва ўтказиши мумкин.

Муҳаммад Ҳодиев