Мессининг маоши MLS тарихидаги рекорд даражага чиқди

Футбол юлдузи Лионель Месси “Интер Майами” билан шартномасини 2028 йил декабригача узайтирди. Шу тариқа аргентиналик футболчи МLS’даги энг кўп маош оладиган футболчига айланди. Бу ҳақда “El Nacional” хабар берди.
 
“Интер Майами” раҳбарларидан бири Хорхе Маснинг маълум қилишича, Мессининг янги шартномадаги йиллик маоши 50–60 миллион доллар оралиғида бўлади. Бу кўрсаткич уни MLS тарихидаги энг юқори маош олувчи футболчига айлантиради. Бундан ташқари, Месси футболкалар ва спорт буюмлари савдосидан, шунингдек, Apple TV орқали MLS транслацияларига обуналар орқали ҳам қўшимча даромад олади.

38 ёшли ҳужумчи “Интер Майами”га 2023 йилда қўшилган ва клубнинг спорт ҳамда тижорат жиҳатидан ривожланишига катта ҳисса қўшган. Месси бу мавсумда жамоасини MLS плей-офф босқичига олиб чиқди. “Интер Майами” плей-офф босқичидаги дастлабки учрашувни жорий йилнинг 24 октябрь куни “Нэшвилл”га қарши ўтказади. У ҳозирда “Интер Майами” сафида жами 71 та гол урган.

Шартнома муддати тугаганда Месси 41 ёшда бўлади ва кўп эҳтимол билан бу Мессининг фаолиятининг охири бўлади.  Шунингдек, аргентиналик юлдуз 2026 йилда АҚШ, Мексика ва Канадада ўтадиган Жаҳон чемпионатида ҳам иштирок этишни режалаштирмоқда. Аргентина амалдаги жаҳон чемпиони сифатида бу турнирга келади ва Месси кетма-кет иккинчи марта жаҳон чемпиони бўлишни мақсад қилган.

Эслатиб ўтамиз, аввалроқ аргентиналик ҳужумчи Лионель Месси АҚШнинг “Интер Майами” клуби билан шартномасини узайтирган ҳақида хабар берилган эди.