Месси билан учрашиш қанчага тушади?

“Интер Майами” клуби ва Аргентина терма жамоаси сардори Лионель Месси 2025 йил декабрь ойида Ҳиндистонга узоқ кутилган ташрифни режалаштирмоқда. Ташкилотчилар мухлислар учун Месси билан учрашиш ва бирга суратга тушиш имкониятини ўз ичига олган махсус пакетлар тайёрлаган. Бу ҳақда NDTV Profit хабар берди.

Сафари доирасида Месси Калькутта, Мумбай ва Нью-Деҳлига ташриф буюради, тўртинчи шаҳар эса ҳали муҳокама қилинмоқда. Ташкилотчилар ушбу сафари давомида футбол, маданият ва ўйин-кулгини бирлаштирган ноёб мухлислар тажрибасини ваъда қилган. Саккиз карра “Олтин тўп” соҳибини кутиб олишни хоҳловчилар учун саёҳатчилар сонига қараб турпакетлар яратилган. 

Аргентиналик футболчи билан учрашиш учун битта мухлис 11 минг доллар, тўрт кишилик оила 28 минг доллар, 10 кишидан иборат гуруҳ эса 107 минг доллар тўлайди.

Пакетга Месси билан учрашув, суратга тушиш, имзо қўйилган Аргентина терма жамоаси либоси, кечки овқат ва ҳужумчининг пенальтилар сериясини томоша қилиш киради.

Мессининг бу сафари учун нафақат ўйин майдонидаги фаолиятини намойиш этиш, балки глобал рамз, футболчи ва элчи сифатида ҳам муҳим воқеа ҳисобланади. Охирги марта Месси Ҳиндистонга 2011 йил Аргентина – Венесуэла ўртоқлик учрашуви учун ташриф буюрган эди.

Эслатиб ўтамиз, аввалроқ “Барселона” президенти Жоан Лапорта клуб афсонаси Лионель Мессининг ҳайкали яқинда қайта очиладиган “Камп Ноу” ташқарисида ўрнатилишини маълум қилган эди.