“Камп Ноу” ташқарисида Мессига ҳайкал қўйилади

“Барселона” президенти Жоан Лапорта клуб афсонаси Лионель Мессининг ҳайкали яқинда қайта очиладиган “Камп Ноу” ташқарисида ўрнатилишини маълум қилди. Каталония клуби тарихдаги энг яхши футболчисини шарафлаш учун доимий ёдгорлик устида ишламоқда. Бу ҳақда “Goal” нашри хабар берди.

Лапорта Барселонада ўтказилган китоб тақдимотида бошқарув кенгаши аллақачон Месси учун доимий ҳурмат рамзини муҳокама қилганини тасдиқлади.

“Месси ҳар доим “Барселона” билан боғлиқ бўлиб қолади. Унинг эшиклари очиқ, биз уни чексиз ҳурмат қиламиз. У энг олий даражадаги эҳтиромга муносиб”,  дейди Лапорта.

Унинг айтишича, Месси ҳайкали стадион ташқарисида Йохан Кройф ва Ладислав Кубала ҳайкаллари қаторидан ўрин олади.

“У клуб тарихига ўз изини қолдирган энг буюк футболчилардан бири. Бу масалани йиғилишда муҳокама қилдик ва устида ишлаяпмиз. Оила розилиги ҳам муҳим. Мухлислар буни жуда исташади”, дея қўшимча қилди Лапорта.

Таъмирлаш учун қарийб 900 кунга ёпилган “Камп Ноу” жорий йилнинг 7 ноябрь куни куни 20 мингдан ортиқ мухлис ташриф буюрган очиқ машғулот билан қайта очилган эди. 

Маълумот учун, Месси “Барса” академиясига 13 ёшида қўшилган ва клуб сафида 778 та ўйинда 672 та гол урган. 21 йиллик фаолияти давомида у жамоа билан 10 та Ла Лига, 4 та Чемпионлар Лигаси ва 3 та клублар ўртасидаги Жаҳон чемпионлиги каби тарихий совринларни қўлга киритган.

Эслатиб ўтамиз, аввалроқ “Барселона” жамоасининг собиқ футболчиси Лионель Месси 2021 йилда клубдан кетгандан сўнг илк бор янги “Камп Ноу”га ташриф буюриб, ўзининг Instagram’ида “қачондир қайтиб келаман” дея изоҳ қолдирган эди.