Месси “Барселона” сафида хайрлашув ўйинида майдонга тушади

“Барселона”нинг собиқ футболчиси Лионель Месси каталонияликлар билан хайрлашув ўйинида майдонга тушади. Бу ҳақда клубнинг собиқ бошқарув кенгаши аъзоси Тони Фрейша маълум қилди.

“Бир ярим йил ичида “Камп Ноу” стадионида Лео Месси билан хайрлашув маросими ўтказилади. Бу аллақачон тасдиқланган”, дейди Фрейша.

Ҳозирча Мессининг хайрлашув маросими доирасида “Барселона” сафида расмий ўйинда майдонга тушиши ёки фақат тантанали тадбирда иштирок этиши ҳақида аниқ маълумот берилмаган.

Маълумот учун, Лионель Месси “Барселона” футбол академияси тарбияланувчиси ҳисобланади. Аргентиналик футболчи 2004 йилдан 2021 йилгача клубнинг асосий жамоасида тўп сурган. У каталонияликлар сафида кўплаб совринларни қўлга киритган, жумладан, Испания чемпионатида 10 марта ва Чемпионлар лигасида 4 марта ғолиб бўлган.

2021 йилда клубнинг молиявий муаммолари сабаб Месси “Барселона”ни тарк этган. 2023 йил ёзидан буён эса у АҚШнинг “Интер Майами” клубида ўйнаб келмоқда. 39 ёшли футболчининг Америка жамоаси билан шартномаси 2028 йил охиригача амал қилади.

Эслатиб ўтамиз, жорий йилнинг 7 октябрь куни Месси Аргентина терма жамоаси сафида Бенинга қарши хайрлашув учрашувида майдонга тушди. У ўйиннинг 71-дақиқасида гол уриб, терма жамоадаги голлари сонини 126 тага етказди. Шунингдек, Месси ўша учрашувдаги 2 та голли узатмани амалга оширганди.