Медведев АҚШни Россиянинг душмани деб атади

Россия Хавфсизлик кенгаши раисининг ўринбосари Дмитрий Медведев АҚШ томонидан жорий этилган янги санкцияларга жавобан чиқиш қилиб, Трампни “сўзамол тинчликпарвар” деб атади. Бу ҳақда у ўзининг Telegram-каналида ёзди. 

Медведев Доналд Трампнинг Будапешт саммитини бекор қилгани ва АҚШнинг Россияга қарши янги санкциялари юзасидан фикр билдирган.

“Агар кимдадир ҳануз иллюзиялар қолган бўлса, мана олинглар. АҚШ – бизнинг душманимиз, уларнинг сўзамол “тинчликпарвари” эса энди Россияга қарши уруш йўлига тўлиқ кириб олди. Ҳа, у ҳозирча Киев томонида фаол урушмаяпти, аммо бу энди унинг можароси, қариб қолган Байденники эмас! Албатта, айтишади: у бошқача қила олмаган, Конгресс босим ўтказган ва ҳоказо. Аммо бу асосий нарсани ўзгартирмайди, қабул қилинган қарорлар – бу Россияга қарши уруш ҳаракатидир. Трамп энди ақлдан озган Европа билан тўлиқ ҳамфикр бўлди”, деб ёзди Медведев.

Қайд этиш жоиз, олдинроқ АҚШ Молия вазирлиги Россиянинг икки йирик нефть компанияси – “Роснефть” ва “Лукойл”га қарши санкциялар жорий этганини эълон қилганди. Вазирликнинг баёнотига кўра, бу чора Россиянинг Украинадаги урушни тўхтатиш бўйича тинчлик жараёнига “жиддий муносабат билдирмагани” билан изоҳланган.

Эслатиб ўтамиз, жорий йилнинг сентабр ойида Дональд Трамп АҚШ Қуролли кучлари олий қўмондонлари олдида чиқиш қилиб, Россия Президенти Владимир Путиндан “ҳафсаласи пир бўлганини” айтган ва Дмитрий Медведевни “аҳмоқ одам” деб атаган эди.

Ундан аввалроқ, август ойида эса Медведев Трампнинг Украина уруши бўйича ультиматумига жавоб ёзган, шундан сўнг Трамп унинг сўзларини “аҳмоқона ва провокацион” деб баҳолаганди.

Шунингдек, Трамп июль ойида Медведевни “муваффақиятсиз президент” деб атаб, “сўзларига эҳтиёт бўлиш”ни маслаҳат берган. АҚШ Президенти Медведев “жуда хавфли ҳудудга кириб бормоқда” деб қўшимча қилган.