Трамп Медведевга “оғзига қараб гапириш”ни маслаҳат берди 

АҚШ Президенти Дональд Трамп Россия Хавфсизлик кенгаши раҳбари ўринбосари Дмитрий Медведевга “ўз сўзларига эҳтиёт бўлиш”ни маслаҳат берди ва уни “ҳали ҳам ўзини президентман деб ҳисоблайдиган муваффақиятсиз собиқ раҳбар” деб атади. Бу ҳақда у бугун, 31 июль куни ўзининг Truth Social тармоғидаги саҳифасида ёзди.

“Ҳиндистоннинг Россия билан нима қилиши менга қизиқ эмас. Улар биргаликда ўлик иқтисодларини йўқ қилишлари мумкин, менга фарқи йўқ... АҚШ Россия билан деярли савдо қилмайди. Келинг, шундай бўлиб қолсин ва Россиянинг муваффақиятсиз собиқ президенти, ҳали ҳам ўзини президентман деб ҳисоблайдиган Медведевга ўз сўзларига эҳтиёт бўлишини айтайлик. Чунки у жуда хавфли ҳудудга кириб бормоқда”, деб ёзган Трамп.

У Медведевнинг қайси пости унинг норозилигига сабаб бўлганига аниқлик киритмади. Аввалроқ Дмитрий Медведев Х ижтимоий тармоғида америкалик сенатор Линдси Грем билан ёзма жанжаллашиб қолган эди.

У Оқ уй раҳбарининг янги ультиматумини – Украина бўйича келишувларга эришиш муддатини 50 кундан 10 кунга қисқартиришини “таҳдид” ва “уруш сари қадам” деб, Трамп ва Грэмни эса “боболар” деб атаганди.

Дмитрий Медведев Трампнинг унга қаратилган баёнотларини “асабий реакция” деб атади:

“Агар Россия собиқ президентининг баъзи бир сўзлари даҳшатли АҚШ Президентида шундай асабий реакцияга сабаб бўлса, демак, Россия ҳамма нарсада ҳақ ва ўз йўлидан боришда давом этади”.

Ҳиндистон ва Россиянинг “ўлик иқтисодиёти” ҳақидаги сўзларни изоҳлар экан, Медведев Трампга “юрувчи ўликлар” ҳақидаги севимли фильмларини эслаб қолишни маслаҳат берди, шунингдек, мавжуд бўлмаган “ўлик қўл” қанчалик хавфли бўлиши мумкинлиги ҳақида ёзди. Медведев бу гап билан “Қиёмат куни машинаси” ёки “Ўлик қўл” деб номланувчи “Периметр” тизимини назарда тутган бўлиши мумкин. Бу Россия ҳудудига ядровий зарба берилганда ва унинг юқори раҳбарияти ҳалок бўлган тақдирда АҚШ ҳудудига рус ядровий ракеталарини учириш учун автоматик тизим. Стратегик ракета кучлари Совет даврида яратилган бундай тизим ҳақиқатан ҳам мавжудлигини даъво қилади.

Собиқ президент ва Россия ҳукуматининг собиқ раҳбари, 2020 йилдан буён ўзи учун махсус тузилган Хавфсизлик кенгаши раисининг ўринбосари лавозимини эгаллаб келаётган Дмитрий Медведев кўпинча ижтимоий тармоқларда содир бўлаётган воқеаларга изоҳ бериб, Ғарб етакчиларига ҳақоратлар ва ядро уруши бошланишига доир яширин таҳдидлар ёзади. Куни кеча Трамп Россиянинг Украина билан сулҳ тузиш муддатини қисқартиришини эълон қилгани муносабати билан у бундай қадамлар Россия ва АҚШ ўртасидаги урушни фақат яқинлаштиришини ёзган эди.

Шунингдек, Медведев Трамп тарафдори ва Россияга қарши санкциялар тўғрисидаги қонун лойиҳасининг ҳаммуаллифи, сенатор Линдси Грэмга мурожаат қилиб, шундай деб ёзди:

“Музокаралар столига қачон ўтиришни белгилаш сизга ёки Трампга қолмади.  Музокаралар ҳарбий амалиётимизнинг барча мақсадларига эришилганда якунланади. Биринчи навбатда Америка учун ишланг, боболар!”

Эслатиб ўтамиз, аввалроқ Дональд Трамп Ҳиндистон учун 25 фоизлик тарифларни эълон қилиб, бу давлатни Россиядан энергия ресурсларини сотиб олишда айблаган эди. 29 июль куни АҚШ Президенти Россияга Украина билан “келишув” тузиш учун 10 кун муҳлат бериб, янги санкциялар, жумладан, Москванинг савдо ҳамкорларига қарши ҳам таҳдид қилган эди.