Трампнинг яна Путиндан ҳафсаласи пир бўлди

АҚШ Президенти Дональд Трамп кеча, 18 сентябрь куни Буюк Британияга ташрифи чоғида Украинадаги тинчлик музокаралари барбод бўлгани туфайли Россия Президенти Владимир Путиндан ҳафсаласи пир бўлганини билдирди. Бу ҳақда у Британия Бош вазири қароргоҳида ўтказилган матбуот анжуманида маълум қилди.

Америка раҳбарининг сўзларига кўра, у дастлаб Украинадаги уруш ҳал қилиниши мумкин бўлган “энг осон” можаро бўлишига ишонган, аммо бу ҳақиқат эмаслиги исботланган.

“Одамлар ўлмоқда ва мен айнан шу сабабни ҳал қилишга мажбурман. Мен еттита урушни ҳал қилганимиздан фахрланаман, улар чидаб бўлмас бўлиб туюларди. Лекин энг осони Путин билан муносабатлар эди. У мени хафа қилди. У ҳақиқатан ҳам ҳафсаламни пир қилди ”, деди Трамп. 

Трамп еттита ҳал қилинган уруш ҳақида гапирганда қайси можароларни назарда тутганига аниқлик киритмади. У Россиянинг Украинага қарши урушини имкон қадар тезроқ тугатишга умид қилганини, бироқ унинг ультиматумлари ва Путинга қилган мурожаатлари натижа бермаганини таъкидлади.

Шу билан бирга, Трамп Путин билан Аляскадаги учрашувини хато деб ҳисобламаслигини қайд этди.  Август ойида АҚШ Президенти Путинни Аляскада музокаралар учун қабул қилди ва бу иттифоқдошлар орасида Россия Президенти билан эҳтимолий яқинлашиш борасида хавотир уйғотди.

Матбуот анжуманида Трамп Путинга қарши қандай чоралар кўришни режалаштираётганига аниқлик киритмади. АҚШ Президенти Ғарб иттифоқчиларини Путинни музокаралар столига ўтиришга мажбурлаш учун Россия нефтини сотиб олишни тўхтатишга чақирмоқда, бироқ ҳозирча Москвага қарши бир томонлама чоралар кўришдан ўзини тияди.

Буюк Британия Бош вазири Кир Стармер ўша матбуот анжуманида сўзга чиқиб, Трампга тўғридан тўғри босим ўтказмасликка ҳаракат қилди, бироқ у ва АҚШ Президенти Путинга босимни қандай қилиб “қатъий равишда ошириш”ни муҳокама қилганини таъкидлади.

“Биз Путинга босимни кучайтиришимиз керак ва Президент Путинга босим ўтказгандагина у ён беришга тайёрлигини кўрсатди. Шунинг учун биз бу босимни кучайтиришимиз керак”, деди Стармер.

Буюк Британияга жўнаб кетишдан олдин Трамп Вашингтонда журналистларга урушни тугатиш учун “Зеленский келишувга эришиши керак”лигини айтди, бироқ у қандай шартларни назарда тутаётганига аниқлик киритмади.

Аввалроқ Украина Президенти Владимир Зеленский сўнгги икки ҳафта ичида Москва Украина ҳудудига минглаб учувчисиз учоқлар, юзлаб ракеталар ва кучли учувчи бомбалар билан ҳужум қилганини маълум қилганди. Бунга жавобан Киев ўзининг узоқ масофали учувчисиз учоқларидан фойдаланган, улар Россия ичидаги жойларга, жумладан нефтни қайта ишлаш заводлари, терминаллар ва омборларга зарба берган.