Trampning yana Putindan hafsalasi pir bo‘ldi

AQSH Prezidenti Donald Tramp kecha, 18 sentyabr kuni Buyuk Britaniyaga tashrifi chog‘ida Ukrainadagi tinchlik muzokaralari barbod bo‘lgani tufayli Rossiya Prezidenti Vladimir Putindan hafsalasi pir bo‘lganini bildirdi. Bu haqda u Britaniya Bosh vaziri qarorgohida o‘tkazilgan matbuot anjumanida ma’lum qildi.

Amerika rahbarining so‘zlariga ko‘ra, u dastlab Ukrainadagi urush hal qilinishi mumkin bo‘lgan “eng oson” mojaro bo‘lishiga ishongan, ammo bu haqiqat emasligi isbotlangan.

“Odamlar o‘lmoqda va men aynan shu sababni hal qilishga majburman. Men yettita urushni hal qilganimizdan faxrlanaman, ular chidab bo‘lmas bo‘lib tuyulardi. Lekin eng osoni Putin bilan munosabatlar edi. U meni xafa qildi. U haqiqatan ham hafsalamni pir qildi ”, dedi Tramp. 

Tramp yettita hal qilingan urush haqida gapirganda qaysi mojarolarni nazarda tutganiga aniqlik kiritmadi. U Rossiyaning Ukrainaga qarshi urushini imkon qadar tezroq tugatishga umid qilganini, biroq uning ultimatumlari va Putinga qilgan murojaatlari natija bermaganini ta’kidladi.

Shu bilan birga, Tramp Putin bilan Alyaskadagi uchrashuvini xato deb hisoblamasligini qayd etdi.  Avgust oyida AQSH Prezidenti Putinni Alyaskada muzokaralar uchun qabul qildi va bu ittifoqdoshlar orasida Rossiya Prezidenti bilan ehtimoliy yaqinlashish borasida xavotir uyg‘otdi.

Matbuot anjumanida Tramp Putinga qarshi qanday choralar ko‘rishni rejalashtirayotganiga aniqlik kiritmadi. AQSH Prezidenti G‘arb ittifoqchilarini Putinni muzokaralar stoliga o‘tirishga majburlash uchun Rossiya neftini sotib olishni to‘xtatishga chaqirmoqda, biroq hozircha Moskvaga qarshi bir tomonlama choralar ko‘rishdan o‘zini tiyadi.

Buyuk Britaniya Bosh vaziri Kir Starmer o‘sha matbuot anjumanida so‘zga chiqib, Trampga to‘g‘ridan to‘g‘ri bosim o‘tkazmaslikka harakat qildi, biroq u va AQSH Prezidenti Putinga bosimni qanday qilib “qat’iy ravishda oshirish”ni muhokama qilganini ta’kidladi.

“Biz Putinga bosimni kuchaytirishimiz kerak va Prezident Putinga bosim o‘tkazgandagina u yon berishga tayyorligini ko‘rsatdi. Shuning uchun biz bu bosimni kuchaytirishimiz kerak”, dedi Starmer.

Buyuk Britaniyaga jo‘nab ketishdan oldin Tramp Vashingtonda jurnalistlarga urushni tugatish uchun “Zelenskiy kelishuvga erishishi kerak”ligini aytdi, biroq u qanday shartlarni nazarda tutayotganiga aniqlik kiritmadi.

Avvalroq Ukraina Prezidenti Vladimir Zelenskiy so‘nggi ikki hafta ichida Moskva Ukraina hududiga minglab uchuvchisiz uchoqlar, yuzlab raketalar va kuchli uchuvchi bombalar bilan hujum qilganini ma’lum qilgandi. Bunga javoban Kiyev o‘zining uzoq masofali uchuvchisiz uchoqlaridan foydalangan, ular Rossiya ichidagi joylarga, jumladan neftni qayta ishlash zavodlari, terminallar va omborlarga zarba bergan.