Маскнинг ҳаво кемаси яна портлаб кетди

SpaceX компаниясининг Starship кемаси кетма-кет иккинчи марта синовдан ўтказиш вақтида портлаб кетди. Бу ҳақда “Reuters” хабар берди.

Маълум қилинишича, ҳодиса кема Техасдаги базадан ҳавога кўтарилганидан бир неча дақиқа ўтиб содир бўлган. Ракета портлаш пайтида ердан 150 км баландликда бўлган.

Портлаш Флорида штатининг бир қисми ва Кариб денгизи устидан кўринган. Авиация федерал бошқармаси портлаш туфайли Майами, Форт-Лодердейл, Палм-Бич ва Орландо аэропортларидаги парвозларни тўхтатган.

SpaceX портлаш ракетанинг бир нечта двигателлари йўқолганидан кейин содир бўлганини маълум қилган ва ҳодиса сабабларини тушуниш учун сўнгги учиришни таҳлил қилишга ваъда берган.

Нашрнинг ёзишича, бу 2025 йилдаги иккинчи Starship портлаши – январь ойида еттинчи синов учирилиши пайтида космик кема ҳам кўтарилганидан кўп ўтмай парчаланиб кетган.

Маълумот учун, Starship – тарихдаги энг катта ва энг кучли ракета. SpaceX маълумотларига кўра, кема одамлар ва юкларни Ернинг паст орбитасига, Ой ва Марсга етказа олади. Тизимнинг умумий тахминий юк кўтариш қуввати 150 тоннани ташкил қилади. Қайта фойдаланиш мумкин бўлган Starship тизими 70 метрли Super Heavy биринчи босқич ва қўшимча двигателларга эга 50 метрлик Starship космик кемасидан иборат.