Машҳур компания минглаб мижозларига нотўғри моделдаги автомобилларни сотди

Хитойнинг йирик автомобиль ишлаб чиқарувчиси BYD Австралияда 2026 йил модели сифатида сотилган 1265 та автомобил аслида 2025 йил модели эканини маълум қилди. Компания бу ҳолат маъмурий хатолик оқибатида юз берганини билдириб, норози мижозларга автомобилни қайтариб, маблағни тўлиқ қайтариб олиш имкониятини тақдим этди. Бу ҳақда Австралиянинг ABC миллий телерадиокомпанияси хабар берди.

BYD маълумотига кўра, Австралияда сотилган автомобиллар мижозларга 2026 йил модели сифатида тақдим этилган бўлса-да, улар амалда 2025 йил модели бўлган. Дастлаб компания жабрланган мижозларга тахминан 1100 АҚШ доллари миқдорида товон пули таклиф қилган. Бироқ бу таклиф мижозларни қониқтирмаган.

Канал бу ҳақда хабар берганидан сўнг жамоатчилик норозилиги кучайган. Шундан кейин BYD қарорини ўзгартириб, истаган мижоз автомобилни қайтариши ва маблағини тўлиқ олиши мумкинлигини эълон қилган. Шунингдек, автомобилни қайтарган харидорлар хоҳишларига кўра, янги, юрмаган BYD автомобилини сотиб олишлари мумкинлиги қайд этилган.

Компаниянинг жамоатчилик билан алоқалар бўйича директори Пол Эллис бу ҳолат тўлиқ маъмурий хатолик туфайли содир бўлганини таъкидлаган.

“Бу ерда ҳеч қандай алдаш ёки ёмон ният бўлгани йўқ. Маблағини қайтариб олган мижозлар хоҳласалар, бошқа янги BYD автомобилини харид қилишлари мумкин”, деган у.

Компаниянинг маълум қилишича, муаммо автомобилнинг модел йилини аниқлашда ишлаб чиқарилган сана эмас, балки заводдан чиқарилган сана ҳисобга олингани сабабли юзага келган. BYD ушбу чалкашлик автомобилларнинг техник хусусиятлари, ишлаш самарадорлиги ёки кафолат шартларига ҳеч қандай таъсир кўрсатмаганини ҳам таъкидлаган.

Эслатиб ўтамиз, аввалроқ Хитой ва бошқа рақобатчилар босими кучайиб бораётган бир пайтда қатъий чоралар кўрилмаса, Европа автосаноатида иш ўринлари кескин қисқариши мумкинлиги хабар қилинганди.