Машҳур блогер аёлнинг куйиб кетган жасади топилди

Францияда аёл кишининг куйиб кетган жасади топилди. Олиб борилган суриштирувлар оқибатида у машҳур TikTok-блогер Соня Беллинага тегишли экани маълум бўлди. Бу ҳақда ВВС хабар берди.

Нашрнинг хабар қилишича, жорий йилнинг 12 август куни фермер Ним шаҳри яқинидаги узумзордан мурдани топиб олган. Бироқ ҳокимият органлари бир неча кун давомида ҳалок бўлган аёлнинг шахсини аниқлай олмаган.

Кеча, 19 август куни шаҳар прокурори тергов ва ДНК таҳлили ўтказилгач, куйиб кетган жасад ижтимоий тармоқларда машҳур бўлган шахс – Соня Беллинага тегишли экани аниқланганини маълум қилган.

29 ёшли қизнинг TikTok’да 260 мингга яқин кузатувчиси бўлган, бир ойдан кейин у 30 ёшни қарши олиши керак эди. У ушбу ҳудудга оиласиникига меҳмонга келган бўлган.

Шунингдек, ушбу иш бўйича полиция маълумотларига кўра “ҳодисада тўғридан тўғри ёки билвосита иштирок этган” икки нафар гумонланувчи қўлга олингани маълум бўлган.

Бу ҳолат ҳали тасдиқланмасдан олдинроқ ўзини блогернинг опаси деб таништирган аёл Сен-Жилль коммунасидаги узумзордан топилган жасад Соняга тегишли эканига амин бўлганини айтган. Унинг сўзларига кўра, Соня ўша куни уйдан чиқиб кетган ва қайтиб келмаган.

Эслатиб ўтамиз, аввалроқ Мексиканинг Кульякан шаҳрида TikTok блогери Сесар Гастелум дўстлари билан жонли эфир олиб бораётган вақтда номаълум қуролли шахслар томонидан отиб ўлдирилганди.