Малида портлашлар уюштирилди. 50 га яқин одам қурбон бўлди
Олам
−
10 Август 2021 4791
Кеча, 9 август куни Мали шимолининг Нигер билан чегарасидаги тўртта қишлоқда террорчилик ҳужумлари содир этилди. Оқибатда 48 нафар тинч аҳоли ҳалок бўлди. Бу ҳақда “Anadolu Agency” нашри хабар бермоқда.
Теракт содир этилган Ансонго коммунаси губернотори ўринбосари Оумар Киданинг таъкидлашича, қуролланган террорчи гуруҳлар Уатагуна туманидаги қишлоқларга ҳужум уюштиришган.
Унинг маълум қилишича, қуролланган террорчи гуруҳлар Малининг Ансонго коммунасининг тўртта қишлоғига ҳужум қилишган. Жумладан, Кару қишлоғига қилинган ҳужумда 17 нафар, Диргуада 7 нафар, Деотегуефда 14 нафар ва Уатагунада 10 нафар тинч аҳоли ҳалок бўлган. Кўплаб маҳаллий аҳоли оғир жароҳатланган.
Шундан сўнг, Малининг вақтинчалик Президенти Ассими Гоита ҳужумларни кескин қоралаган ва минтақада антитеррор операция бошланганини маълум қилган.
Хабарга кўра, Гоита Twitter'да Мали халқи терроризмга қарши курашда янада қатъият кўрсатиши кераклигини таъкидлаб ўтган. Шунингдек, Президент ҳужумда ҳалоқ бўлганлар учун уч кунлик мотам эълон қилган.
Маълумот ўрнида, Саҳел минтақасидаги учта давлат – Буркина-Фасо, Мали ва Нигер сўнгги йилларда “Aл -Қоида”га алоқадор гуруҳлар ва ИШИД томонидан мунтазам равишда ҳужумга учрамоқда.
2013 йилдан бери Малида хорижий ҳарбий миссиялар жойлаштирилганига қарамай, мамлакатдаги террорчи ташкилотлар ҳужумларни давом эттирмоқда.
