“Лукойл” санкциялар туфайли хориждаги активларини сотади

Россиянинг энг йирик нефть компанияларидан бири “Лукойл” ўзининг хориждаги активларини сотиш қарорини эълон қилди. Бунга сабаб сифатида “бир қатор давлатлар томонидан компаниянинг ўзи ва унинг шуъба корхоналарига нисбатан жорий этилган чеклов чоралари” кўрсатилди. Бу ҳақда компаниянинг расмий сайтида эълон қилинди.

“Потенциал харидорлардан келган таклифлар кўриб чиқилмоқда”, дейилади хабарда.

Компания маълумотига кўра, активларни сотиш жараёни АҚШ Молия вазирлиги таркибидаги Ташқи активларни назорат қилиш бошқармаси (OFAC) томонидан берилган лицензия доирасида амалга оширилмоқда. Ушбу лицензия “Роснефть” ва “Лукойл” билан боғлиқ битимларни босқичма-босқич тўхтатишни тартибга солади.

OFAC “Лукойл” билан боғлиқ барча операцияларни тугатиш учун бир ой муддат белгилаган ва бу муддат жорий йилнинг 21 ноябрида якунланади. Шу қоидалар “Роснефть” компаниясига ҳам татбиқ этилган. Чекловлар, шунингдек, уларнинг 50 фоиздан ортиқ улушга эга шуъба корхоналарига ҳам тааллуқли бўлади.

Эслатиб ўтамиз, жорий йилнинг 22 октябрь куни АҚШ Молия вазирлиги Россияга қарши янги санкциялар жорий этилганини эълон қилган эди. Сабаб сифатида Москванинг Украинадаги урушни тугатиш бўйича “тинчлик жараёнига жиддий қизиқиш билдирмагани” кўрсатилди.

Ҳужжатда қайд этилишича, санкциялар Россия ҳудудида жойлашган “Лукойл” ва “Роснефть” компанияларининг шуъба корхоналарига татбиқ этилади. Умуман олганда, АҚШ Молия вазирлиги рўйхатига 34 та шўба корхона киритилган. Уларнинг 28 таси “Роснефть”га, 6 таси эса “Лукойл”га тегишли.

Шунингдек, “блокланган шахслар”нинг 50 фоиз ёки ундан кўпроғига эгалик қилувчи барча юридик шахсларнинг активлари ҳам музлатилади. Бундай чекловларни бузган АҚШ ёки хориж фуқароларига фуқаролик ёки жиноий жавобгарлик чораларини қўллаш назарда тутилган.