АҚШ “Роснефть” ва “Лукойл”га қарши санкция киритди

Кеча, 22 октябрь куни АҚШ Молия вазирлиги Россиянинг икки йирик нефть компанияси – “Роснефть” ва “Лукойл”га қарши санкциялар жорий этганини эълон қилди.

Вазирликнинг баёнотига кўра, бу чора Россиянинг Украинадаги урушни тўхтатиш бўйича тинчлик жараёнига “жиддий муносабат билдирмагани” билан изоҳланди.

“Ҳозир қотилликларни тўхтатиш ва дарҳол отешкесим эълон қилиш вақти келди. Президент Путиннинг бу маънисиз урушга чек қўйишдан бош тортганини ҳисобга олган ҳолда, Молия вазирлиги Кремль ҳарбий машинасини молиялаштираётган Россиянинг икки йирик нефть компаниясига қарши санкциялар жорий қилмоқда”, деди АҚШ Молия вазири Скотт Бессант.

Пресс-релизда таъкидланишича, санкциялар “Лукойл” ва “Роснефть”нинг Россия ҳудудида жойлашган филиалларига ҳам татбиқ этилади. Умумий рўйхатда 34 та компания бор: шулардан 28 таси “Роснефть”, 6 таси “Лукойл”га тегишли.

“Бугунги қарор натижасида юқорида қайд этилган шахслар ва компанияларнинг АҚШдаги ёки АҚШ фуқаролари назоратидаги барча активлари ва мол-мулклари музлатиб қўйилади ҳамда бу ҳақда OFAC'га хабар берилиши шарт”, дейилади баёнотда.

Шунингдек, санкцияланган шахс ёки компаниялар улуши 50 фоиздан ортиқ бўлган барча юридик шахслар ҳам блокланади. Бу қоидаларни бузган шахслар – ҳам АҚШ фуқаролари, ҳам хорижликлар – нисбатида фуқаролик ёки жиноий жавобгарлик чоралари қўлланиши мумкин.

АҚШ Президенти нега айнан ҳозир Россияга нисбатан санкция жорий этгани ҳақидаги саволга шундай жавоб берди:

“Мен ҳис қилдимки, вақти келди. Биз узоқ кутдик”, деди у.

Трамп санкцияларнинг кўламини “жуда катта” деб баҳолади. Журналистлар нега бу санкциялар Москвага Украинада отешкесимга рози бўлиш учун таъсир қилади, деб ўйлаётганини сўрашганда, у шундай деди:

“Бунинг натижаси қандай бўлишини билмайман. Аммо таъсири бўлади, деб ўйлайман, чунки бу нефть соҳасига тегишли жиддий санкциялар. Умид қиламанки, Путин ҳам, Зеленский ҳам ақл билан иш тутади – ахир тангода икки киши рақсга тушади”.

АҚШ Президенти таъкидлашича, агар Путин Украинага қарши ҳарбий ҳаракатларни тўхтатишга рози бўлса, санкциялар тезда бекор қилиниши мумкин.

Эслатиб ўтамиз, 15 октябрь куни Буюк Британия ҳам “Лукойл” ва “Роснефть”га қарши санкциялар жорий этган эди.