Луис Энрике ПСЖни тарк этмоқчи

Испаниялик мураббий Луис Энрике Париж клуби билан шартномасини янгилашни режалаштирмаяпти ва мураббий шартномаси якунлангач жамоани тарк этмоқчи. Бу ҳақда “El Nacional” нашри хабар берди.

Нашрнинг ёзишича, Луис Энрике Франция клуби ПСЖ билан амалдаги шартномасини узайтириш таклифини рад этган. Испаниялик мутахассиснинг шартномаси кейинги мавсум охиригача, яъни 2027 йил 30 июнгача амал қилади ва у кейинги мавсумдан сўнг клубни тарк этишни режалаштирмоқда.

Луис Энрике 2023 йил ёзидан бери ПСЖ бош мураббийи сифатида фаолият юритмоқда. Шу вақт мобайнида у жамоани иккита Франция чемпионлиги, иккита Франция кубоги ва битта Франция суперкубогига олиб чиқди. Шунингдек, Энрике қўл остида “Пари Сен-Жермен” UEFA Суперкубоги, Қитъалараро кубоги ва Чемпионлар Лигасида ҳам ғолиб бўлди.

Эслатиб ўтамиз, аввалроқ Парижнинг ПСЖ клуби Луис Энрикега узоқ муддатли шартнома, ҳатто умрбод шартнома деб таърифланган вариантни таклиф қилиш имкониятини жиддий кўриб чиқаётгани ҳақида хабар берилган эди.