Кремль ҳам Оқ уйдаги жанжалга изоҳ берди

north_east

Оқ уйдаги “отишма”. Трамп ва Зеленский ёқалашмади, холос!

Кремль Оқ уйдаги можарога биринчи марта расман изоҳ бериб, Украина етакчиси Владимир Зеленскийнинг АҚШ Президенти Дональд Трамп билан оммавий мунозарасини “мисли кўрилмаган” деб атади. Бу ҳақда бугун, 3 март куни Россия Президенти матбуот котиби Дмитрий Песков маълум қилди.

“Зеленский кўп жиҳатдан дипломатик маҳоратнинг тўлиқ етишмаслигини кўрсатди”, деди Песков.

Унинг сўзларига кўра, Зеленский ва Трамп ўртасидаги оғзаки тортишув Россия-Украина можаросини ҳал қилиш “қанчалик қийин” бўлишини кўрсатган.

“Киев режими ва Зеленский тинчликни истамайди, улар уруш давом этишини хоҳлайди”, деди Кремль воизи.

Шунингдек, у халқаро ҳамжамиятни “Зеленскийни тинчликни хоҳлашга мажбурлаш”га чақирди.

“Агар европаликлар буни уддалай олса, уларни ҳурмат қилиш ва мақташ керак”, деди Песков.

Журналистларнинг Кремль Зеленскийнинг Россия томонидан ҳозирда босиб олинган ҳудудларнинг аннексия қилинишини тан олмаслиги ҳақидаги баёнотларини қандай баҳолаши ҳақидаги саволига Песков шундай жавоб берди:

“Ҳудуддаги ҳақиқий вазиятни қабул қилишни истамаслик сифатида”.

Кремль матбуот котиби, шунингдек, АҚШ ва Россия ўртасида “Шимолий оқим 2” лойиҳасини қайта бошлаш бўйича махфий музокаралар олиб борилгани ҳақидаги хабарларни ҳам рад этди.

“Bild” нашрининг ёзишича, Швейцариядаги ушбу музокараларда арзон рус гази яна Германияга оқиб кела бошлаши, АҚШ эса воситачи сифатида таъминотни тартибга солиб, бу йўлда пул ишлаб топиши мумкинлиги муҳокама қилинган.

“Менимча, нашрда тилга олинган шахс буни аллақачон рад этган. Америкаликлар эса буни рад этишган. Ҳозир ҳақиқатга тўғри келмайдиган кўплаб маълумотлар бор”, деди Песков.

Овал офисдаги жанжал

АҚШ ва Украина ўртасида Украина фойдали қазилмаларига кириш тўғрисидаги битим 28 февраль куни Оқ уйнинг Овал кабинетида имзоланиши режалаштирилган эди, бироқ имзоланиш олдидан бўлиб ўтган протокол тадбири чоғида Зеленский ва Трамп оғзаки жанжаллашиб қолган, бунда АҚШ вице-президенти Жеймс Дэвид Вэнс ҳам иштирок этган. Оқибатда Зеленский Оқ уйни муддатидан олдин тарк этишга мажбур бўлди ва келишув имзоланмади.

Зеленский жанжалдан сўнг дарҳол “Fox News” телеканалига берган интервьюсида бошловчининг бўлган воқеа учун узр сўраш зарурлигини ҳис қилдими ёки йўқми деган саволига жавоб берар экан, Қўшма Штатлардан миннатдор эканини, бироқ “мен ёмон иш қилганим йўқ, деб ўйламайман” ва “баъзи нарсаларни камерадан ташқари муҳокама қилиш кераклигини” қўшимча қилди.

Кейинроқ АҚШ Давлат котиби Марко Рубио ҳам Зеленскийдан кечирим сўрашни талаб қилди.