Хитойда дунёдаги энг йирик туннель қазиш машинаси ясалди

Хитойда диаметри бўйича дунёдаги энг йирик икки қалқонли туннель қазиш комплекси яратилди. Бу ҳақда “Naked Science” хабар берди.

Қайд этилишича, Yuexi деб номланган қурилма Сичуань провинциясининг маъмурий маркази Чэндуда жорий йилнинг сентябрь охирида ишлаб чиқариш линиясидан чиқарилган.

Қурилманинг диаметри 13,01 метр, узунлиги 220 метр, оғирлиги эса 3500 тоннани ташкил этади. У Хитойнинг Shudao Investment Group инфратузилма компанияси ҳамда China Railway Engineering Equipment Group давлат компанияси томонидан биргаликда ишлаб чиқилган.

Yuexi туннель қазиш вақтида тоғ жинслари ва тупроқни парчалаш, туннель деворларини темир-бетон конструкциялар билан мустаҳкамлаш ҳамда қазиб олинган жинсларни чиқариб ташлаш ишларини бир вақтнинг ўзида бажариши мумкин.

Машинанинг кесувчи қалқони диаметри 48 сантиметр бўлган 83 та дискли кескич билан жиҳозланган. Шунингдек, унда бурғилаш ва геологик разведка тизимлари мавжуд бўлиб, улар машина етиб бормасидан олдин тоғ жинсларининг ҳолатини баҳолаш имконини беради.

Автоматик лазерли йўналтириш тизими ўлчашдаги хатоликни 3 миллиметргача чеклайди. Шу сабабли қурилма 10 километрдан ортиқ масофада ҳам миллиметр даражасидаги аниқликни сақлаши мумкин.

Yuexi Сичуань провинциясидаги Ляншань-И автоном округида Жинкоухэ–Сичан тезюрар автомобиль йўли таркибида қурилаётган 18,4 километр узунликдаги Yuexi туннелида қўлланади.

Қайд этилишича, машина ойига 380 метрдан ортиқ туннель қазиши мумкин. Ушбу технология анъанавий бурғилаш ва портлатиш усулига нисбатан қурилиш самарадорлигини 3–5 баробарга ошириши кутилмоқда.

Мазкур лойиҳа Хитойда йирик икки қалқонли туннель қазиш машинасидан автомобиль туннелининг асосий қисмини қуришда фойдаланилаётган илк ҳолат ҳисобланади. Бундай қурилмалар аввалроқ асосан темирйўл ва метро туннелларини қуришда қўлланган.

Эслатиб ўтамиз, аввалроқ Хитойнинг оғир машинасозлик маҳсулотлари ишлаб чиқарувчи “Zoomlion” компанияси дунёдаги энг баланд ЛW3600-240НБ серияли минорали кранни тақдим этгани ҳақида хабар берилган эди.