Каллас АҚШ ва Исроилни Эрон урушини тугатишга чақирди

Европа Иттифоқининг ташқи ишлар бўйича Олий вакили Кая Каллас АҚШ ва Исроилни Эронга қарши урушни якунлашга чақирди, шунингдек, ЕИ Яқин Шарқ давлатлари билан можарони қандай тартибга солиш бўйича маслаҳатлашувлар ўтказаётганини маълум қилди. Бу ҳақда у бугун, 17 март куни Брюсселда “Reuters”га берган интервьюсида сўз очди.

Каллас Европанинг Ҳормуз бўғозида кема қатнови эркинлигини тиклаш ҳаракатларида иштирок этиши учун эшиклар очиқ қолаётганини, бироқ бундай иштирок катта эҳтимол билан дипломатик ечимнинг бир қисми бўлишини айтган.

“Ҳеч ким ўз одамларини Ҳормуз бўғозидаги олов ичига юборишга тайёр эмас. Биз бўғозни очиқ сақлаш ҳамда озиқ-овқат, ўғит ва энергетика соҳаларида инқирозга йўл қўймаслик учун дипломатик йўлларни топишимиз керак”, дейди у.

Эслатиб ўтамиз, аввалроқ Дональд Трамп НАТО бўйича иттифоқчилари ва ҳамкор давлатларга мурожаат қилиб, Ҳормуз бўғозида кемалар қатнови хавфсизлигини таъминлашда ёрдам беришга чақирганди. Бироқ кўплаб Европа давлатлари АҚШ Президенти Дональд Трампнинг нефть, газ ва бошқа товарлар транзити учун ўта муҳим нуқта бўлган бўғоздаги Эрон блокадасини ёриб ўтиш миссиясида иштирок этиш ҳақидаги чақириқларини рад этди.

Европа Иттифоқи ташқи сиёсий хизмати вакили Анвар ал-Ануний ЕИ Ҳормуз бўғозини очиш бўйича Эрон билан дипломатик даражада музокаралар олиб бораётганини маълум қилди.