Қуёшда кучли чақнашлар содир бўлди

Кеча, 2 февраль куни NASA ва АҚШ космик об-ҳаво хизматлари Қуёшдаги кучли фаоллик сабаб бутун дунё бўйлаб космик об-ҳаво огоҳлантиришларини маълум қилди. Бу ҳақда “The News Times” хабар берди.

Маълумотга кўра, тез кенгаяётган 4366-рақамли қуёш доғи кеча, 2 февраль куни тўртта кучли Х тоифали қуёш чақнашини юзага келтирган.  Энг кучли ҳодиса эса жорий йилнинг 1 февраль оқшомида Х8.1 даражадаги чақнаш билан қайд этилган. У 2024 йил октябрь ойидан буён кузатилган энг ёрқин қуёш чақнаши сифатида баҳоланган.

NASA ва АҚШ космик об-ҳаво мутахасисларининг фикрига кўра, февраль ойининг биринчи ҳафтасида ушбу фаол қуёш доғи энг кучли портлашларни келтириб чиқаради. Бунинг оқибатида Ерда айрим технологик тизимлар ишида узилишлар кузатилиши таҳмин қилинмоқда.

Х тоифали чақнашлар қуёш портлашларининг энг кучли даражаси ҳисобланади. Бундай чақнашлар радиоалоқа, электр тармоқлари ва навигация сигналларига таъсир кўрсатиши, шунингдек, космик кемалар ҳамда астронавтлар учун жиддий хавф туғдириши мумкин.

Олимларнинг хабар беришича, портлаш оқибатида Ерга ультрабинафша ва рентген нурлари бевосита тушмоқда. Бу ҳолат юқори атмосферанинг ионлашувига олиб келиб, Жанубий Тинч океани ҳудудида Р3 даражадаги кучли радио узилишларини келтириб чиқарган.

Бундан ташқари Австралиянинг шарқий қисми ва Янги Зеландияда қисқа тўлқинли радиоалоқа узилишлари кузатилган. Мутахассисларнинг айтишича, бу фаоллик тез кенгаяётган 4366-рақамли қуёш доғи билан боғлиқ бўлиб, мазкур ҳудуд бир кун ичида 20 дан ортиқ қуёш чақнашини ҳосил қилган.

Шунингдек, чақнашлар оқибатида юзага келган магнит заррача булути Ер томон йўналган. Плазма булути жорий йил 5 февраль атрофида Ерга яқинлашиши ва пастроқ кенгликларда аврораларни келтириб чиқариши мумкин. Ва бу ҳодисани одамлар ўз кўзлари билан кўришлари мумкин.

Эслатиб ўтамиз, аввалроқ Қуёшда катта портлаш юз бергани, портлаш манбаи Қуёшнинг орқа томонида жойлашгани ҳақида хабар берилганди.

Суннатова Фарангиз