Қозоғистон Президенти Танзила Норбоевани мукофотлади (видео)

Қозоғистон Президенти Қосим Жомарт-Тўқаев бугун, 18 август куни Ўзбекистон Республикаси Олий Мажлиси Сенати Раиси Танзила Норбоевани 2-даражали “Дўстлик” ордени билан мукофотлади. Бу ҳақда Оқўрда матбуот хизмати хабар берди.

Норбоева бошчилигидаги парламент делегацияси жорий йилнинг 18-19 август кунлари Қозоғистон Республикаси Парламенти Сенати Раиси Маулен Ашимбаевнинг таклифига биноан расмий ташриф билан Остона шаҳрида бўлиб турибди.

Ўзбекистон Сенати Раисини Қозоғистон Республикаси Парламенти Сенати Раиси ўринбосари Олга Перепечина кутиб олди. Парламент делегацияси дастлаб Остона шаҳридаги Ватан озодлиги ва мустақиллиги учун кураш йўлида Қозоғистон халқининг жасорати, матонати ва қаҳрамонлиги рамзи бўлган “Отан қорғаушилар” ёдгорлиги пойига гул қўйди. 

Кейин Танзила Норбоева Қозоғистон Республикаси Парламенти Сенати Раиси Маулен Ашимбаев ва Қозоғистон Республикаси Парламенти Мажлиси Раиси Ерлан Кошанов билан учрашувлар ўтказди.

У Қозоғистон Президенти қабулида ҳам бўлди. Суҳбат чоғида парламентлараро алоқаларни ривожлантириш контекстида Қозоғистон-Ўзбекистон стратегик шериклик ва иттифоқчиликнинг долзарб масалалари муҳокама қилинди. Президент Тўқаев Ўзбекистон Олий Мажлиси Сенати Раисини самимий қутлар экан, унинг Остонага ташрифи Қозоғистон билан Ўзбекистон ўртасидаги стратегик муносабатларнинг ўзига хос хусусиятининг ёрқин тасдиғи эканини таъкидлади.

Қосим-Жомарт Тўқаев Танзила Норбоеванинг икки халқ ўртасидаги дўстлик ва яхши қўшничилик ришталарини мустаҳкамлашга қўшган шахсий ҳиссасини юқори баҳолади.

“Ташрифингиз мамлакатларимиз ўртасидаги дўстона муносабатларни мустаҳкамлаш нуқтаи назаридан жуда муҳим. Биз қардош Ўзбекистон билан ҳамкорликни ривожлантиришга биринчи навбатда эътибор қаратамиз. Бу Марказий Осиё минтақасида барқарорлик ва хавфсизликни таъминлашда жуда муҳим омил, деб ҳисоблаймиз. Мамлакатларимиз ўртасидаги муносабатлар қанчалик яхши, яқин ва самарали бўлса, умуман минтақадаги вазият шунчалик тинч бўлади. Сизнинг ташрифингизга келсак, буни муносабатларимизнинг ўта муҳим элементи бўлган парламентлараро алоқаларни мустаҳкамлаш нуқтаи назаридан ҳақиқатдан ҳам муҳим, деб биламан”, деди давлат раҳбари.

Танзила Норбоева Қосим-Жомарт Тўқаевга самимий қабул учун миннатдорлик билдириб, Президент Шавкат Мирзиёевнинг саломини етказди.

“У мендан сизларга ўзининг самимий саломи, сиз қўйган вазифаларни ҳаётга татбиқ этиш йўлидаги эзгу тилакларини етказишимни сўради. Ва, албатта, у мендан барча эришилган келишувлар унинг шахсий назорати остида эканини айтишимни сўради. Биз эса, албатта, Президентнинг бутун жамоаси, жумладан, парламент ҳам уларни ҳаётга татбиқ этишга ҳаракат қиламиз, аниқ натижалар бўлади. Сиз айтганингиздек, Ўзбекистон учун Қозоғистон, Қозоғистон учун Ўзбекистон энг яқин, ишончли ҳамкордир”, деди Ўзбекистон Олий Мажлиси Сенати Раиси.

Суҳбатдошлар парламентлараро дипломатияни, шунингдек, савдо-иқтисодий ва сармоявий ҳамкорликни янада ривожлантириш масалаларини муҳокама қилди. Маданий-гуманитар алоқаларни мустаҳкамлашга алоҳида эътибор қаратилди.

Фурсатдан фойдаланиб, Қосим-Жомарт Тўқаев Ўзбекистон Президенти Шавкат Мирзиёевга самимий тилакларини йўллади. 
Қозоғистон раҳбари Танзила Норбоевани икки томонлама стратегик шерикликни чуқурлаштириш йўлидаги тинимсиз саъй-ҳаракатлари учун 2-даражали “Дўстлик” ордени билан тақдирлади.

Эслатиб ўтамиз, 2022 йилда Ўзбекистон Олий Мажлиси Сенати раиси Танзила Норбоева Россия Президенти Владимир Путин номидан “халқлар ўртасидаги ҳамкорлик ва ўзаро ҳамжиҳатликни мустаҳкамлашга қўшган улкан ҳиссаси учун” “Дўстлик” ордени билан тақдирланганди. Орденни Норбоевага Россия Федерацияси Федерация кенгаши спикери Валентина Матвиенко 28 октябрь куни Самарқандда бўлиб ўтган МДҲ Парламентлараро Ассамблеяси сессиясининг ялпи мажлисида топширганди. Ўшанда Норбоева “Бу орденга албатта муносиб бўламиз” (Мы этот орден обязательно отработаем), деб ваъда берганди.