Қирғизистонда аёл киши давлат тўнтариши уюштираётгани аниқланди 

Қирғизистонда режалаштирилган давлат тўнтариши иштирокчиларининг ҳибсга олиниши тафсилотлари маълум бўлди. Қирғизистон Миллий хавфсизлик давлат қўмитаси Бишкекда ҳокимиятни зўравонлик йўли билан тортиб олиш мақсадида оммавий тартибсизликлар уюштириш режалаштирилганини тасдиқлади. Бу ҳақда “24.kg” хабар берди.

Қўмита маълумотларига кўра, ташкилотчи ва ғоявий илҳомлантирувчи “Элдик Кенеш” сиёсий партияси раиси Роза Нурматова бўлган. Йил давомида у мақсадли равишда тарафдорларини жалб қилган ва энг норози фуқаролардан жами 100 га яқин кишини тўплаган.

Таъкидланишича, жиноий гуруҳ хориждан маблағ олиб, мамлакатдаги ҳокимиятни қўлга киритиши, ҳар қандай воқеадан жамоатчилик норозилиги учун фойдаланиб, ҳокимиятни эгаллаши керак бўлган. 

Хавфсизлик хизматлари томонидан видео ҳам эълон қилинган. Унда ҳибсга олинганларнинг давлат тўнтариши режасини муҳокама қилаётгани тасвирланган. Видеода Роза Нурматованинг ўзгаришлар бўладими, деб сўрагани эшитилади. Бир неча сониядан кейин эса у тартибсизлик бўлиши тайинлигини айтган.

“Бу ҳолатда бизнинг ролимиз қандай бўлади? Йигитлар бор, ҳар бирига ўн кишидан тўғри келади. Масалан, бизда ҳар бирига 10 мингдан тўлайдиганлар бор”, дейди у.

Бундан ташқари, Роза Нурматова ёриб ўтиш, қўлга олиш кераклигини ҳам таъкидлаган.

“Масалан, мен бунга ич-ичимдан тайёрман. Қанча йигит борлигини аллақачон билишингиз керак, бизга рақам керак, жисмоний куч ҳам керак”, деган Нурматова.

Шунингдек, видеода кадр ортидаги яна бир шахснинг ўзи ва яна 10 киши Манас қишлоғини аллақачон тарк этгани ҳақида гапирганини эшитиш мумкин.

“Мен йигитларни йиғиб олдим, жуда кеч эди. Мен уларни Таласда қолдирмоқчи эдим, улар хоҳламадилар, пуллари йўқ экан. Шундай қилиб, ҳаммани ўзим йиғдим. Бугун жуда кеч, эртага учрашамиз”, деган номаълум шахс видеода. 

Маълумот учун, Роза Нурматова 64 ёшда. У 2010 йилда ўз партиясини ташкил этган. 2011 йилда эса Қирғизистон президентлигига номзод Қамчибек Ташиевнинг ишончли вакили бўлган. 2012 йилга келиб Садир Жапаров ва Қамчибек Ташиев тарафдорлари штабига раҳбарлик қилган. Садир Жапаров, Қамчибек Ташиев ва Талант Мамитов ҳибсга олингандан сўнг, у митингда қатнашган ва Қамчибек Ташиевни фаол ҳимоя қилган. Бундан ташқари, Нурматова давлат аппаратида ижтимоий бўлим бошлиғи лавозимида ҳам ишлаган.

Эслатиб ўтамиз, жорий йилнинг 5 июнь куни Қирғизистон Миллий хавфсизлик давлат қўмитаси ходимлари “эҳтимолий давлат тўнтариши иштирокчилари”ни оммавий ҳибсга олган эди. Кейинчалик хавфсизлик хизмати томонидан жами 30 киши ҳибсга олингани, улардан беш нафари фитнани тан олган айтилди.