Қирғизистон ёнилғи экспортини тўлиқ тақиқлади

Қирғизистон ички бозорни тўйинтириш мақсадида мамлакатдан ёқилғи олиб чиқишни тақиқлади ва нефть маҳсулотларини олиб кириш қоидаларини юмшатди. Бу ҳақда кеча, 13 июль куни республика ҳукуматининг расмий сайтида эълон қилинган қарорда айтилади.

Шу вақтгача чекловлар Қирғизистондан Евроосиё иқтисодий иттифоқи (ЕОИИ) божхона ҳудудидан ташқарига ёқилғи етказиб беришга нисбатан амал қилган бўлса, эндиликда тақиқ иттифоқ ичидаги экспортга ҳам татбиқ этилган. Истисно тариқасида нафта, мазут ва печка ёқилғисига рухсат берилган. Уларни хорижда қайта ишлаш ва кейинчалик қайта ишланган нефть маҳсулотини тўлиқ ҳажмда мамлакатга қайтариш мажбурияти билан олиб чиқишга аввалгидек йўл қўйилади. Бундай экспорт учун ҳар бир етказиб беришни ҳукумат билан махсус келишиш талаб этилади.

Жорий йилнинг май ойида Қирғизистон расмийлари ёнилғи етказиб берувчиларга субсидия ажратишни бошлаб, харид нархи ва давлат томонидан белгиланган нарх ўртасидаги фарқни 30 сентябргача қоплаб беришни назарда тутган. Бироқ жорий йилнинг 8 июль куни ҳукумат AI-95 маркали бензин нархини тартибга солишни ва чакана нархларнинг чегарасини бекор қилди.

Эслатиб ўтамиз, аввалроқ Қирғизистон Россия Федерациясида автомобиль ёнилғиси билан боғлиқ муаммолар фонида ёрдам сўраб Ўзбекистон, Қозоғистон, Озарбайжон, Туркманистон ва Беларусга мурожаат қилгани ҳақида хабар берилган эди.