Италияда самолёт автомобиль йўлига қулаб тушди (видео)

Кеча, 22 июль куни Италиянинг Брешиа шаҳрида икки йўловчиси бўлган енгил моторли самолёт автомобиль йўлига қулаб тушди ва бортда бўлган икки киши воқеа жойида вафот этди. Бу ҳақда “Corriere della Sera” хабар берди.

Маҳаллий нашр берган хабарга кўра, самолёт 22 июль куни тушдан кейин Пьяченца шаҳридан ҳавога кўтарилган.

Самолётда Миландан бўлган адвокат Сергио Раваля ва унинг шериги Анна Мария Де Стефано бўлган. Улар “Korda Molle” автомобиль йўли ҳудудига қулаб тушган. Иккала йўловчи ҳам ҳалок бўлган.

Кузатув камераларидаги кадрларда самолёт тирбанд йўлга қулаб тушгани ва ёнғин чиққани акс этган. Ҳодиса вақтида йўлдан ўтаётган автомобилларда бўлган ҳайдовчилар ва йўловчиларга зарар етмаган. Воқеа сабаблари аниқланмоқда, тергов ишлари олиб борилмоқда.

Эслатиб ўтамиз, 21 июль куни Бангладеш пойтахти Даккада Ҳарбий-ҳаво кучларининг F-7 самолёти ҳалокатга учраб, коллеж ва мактаб кампусига қулаганди. Фожиа оқибатида 27 киши ҳалок бўлган, уларнинг 25 нафар болалардан иборат.