Инфантино устидан FIFA’га шикоят қилинди

Инсон ҳуқуқлари бўйича “FairSquare” нотижорат ташкилоти FIFA президенти Жанни Инфантино устидан Этика қўмитасига расмий шикоят йўллади.  Ҳужжатда FIFA президенти ўзининг сиёсий бетарафлик мажбуриятини “қайта-қайта бузган”лиги айтиб ўтилган. Бу ҳақда “Associated Press” хабар берди.

Манбага кўра, шикоятда FIFA'нинг илк Тинчлик мукофотини АҚШ президенти Дональд Трампга топшириш жараёнини текшириш талаб қилинган. Ташаббускорлар бир нечта эпизодларни, жумладан Трампнинг сиёсий дастурини тасдиқлаш, Тинчлик мукофотини АҚШ президентига тақдим этиш ва Америка етакчисига қаратилган мақтовли нутқларни қоидабузарлик сифатида баҳолаш мумкинлигини таъкидлаган.

FIFA қоидаларига кўра, қоида ва қоидабузарликлар учун санкциялар огоҳлантириш, танбеҳ, жарима, қоидаларга риоя қилишни ўргатиш ҳамда футбол билан боғлиқ ҳар қандай фаолиятда иштирок этишни тақиқлашни ўз ичига олади.

Эслатиб ўтамиз, аввалроқ FIFA бошқарув қўмитасининг собиқ раиси Мигел Мадуро FIFA президенти Жанни Инфантинони сиёсий бетарафлик тамойилларини бузганликда айблаган эди.