Инфантино сиёсий бетарафлик қоидаларини бузди – FIFA собиқ ходими

FIFA бошқарув қўмитасининг собиқ раиси Мигел Мадуро FIFA президенти Жанни Инфантинони сиёсий бетарафлик тамойилларини бузганликда айблади. Бу ҳақда "Sweden Herald" нашри хабар берди.

Мадуронинг фикрича, Инфантино яқинда АҚШда ўтказилган Америка бизнес-форуми чоғида АҚШ Президенти Дональд Трампни мақтов билан тилга олгани ва унинг сиёсатини очиқчасига қўллаб-қувватлагани FIFA ахлоқ кодексининг 15-моддаси сиёсий нейтраллик талабига зид ҳисобланади.

Инфантино форумда сўзлаган нутқида Трампни “яқин дўст” деб атаб, шундай деган эди:

“Ўйлайманки, биз ҳаммамиз унинг қилаётган ишини қўллаб-қувватлашимиз керак”.

Мадуронинг сўзларига кўра, бу баёнот шунчаки Трампнинг қонуний раҳбар сифатида тан олинишидан кўра чуқурроқ маънога эга.

"У нафақат Трампнинг сиёсатини маъқуллайди, балки бошқаларни ҳам уни қўллаб-қувватлашга чақиради. Бу эса сиёсий баҳсда позиция эгаллаш демакдир",  деди Мадуро "The Athletic" нашрига берган интервьюсида. 

Мадуронинг таъкидлашича, FIFA президенти сиёсий жиҳатдан бетараф бўлиши лозим, чунки ташкилот ўз низомида барча сиёсий тарафкашликлардан қатъиян тийилиш мажбуриятини олган.

Мазкур ҳолат FIFAнинг мустақил Этика қўмитаси томонидан терговга олиб борилиши мумкин. Қўмита FIFA амалдорларининг ахлоқий меъёрларга риоя этишини назорат қилади ва зарурат туғилганда интизомий чора кўради.

Эслатиб ўтамиз, аввалроқ FIFA 2026 йилги Жаҳон чемпионатига қуръа ташлаш маросими чоғида янги  "FIFA Тинчлик" мукофотининг биринчи соҳибини эълон қилишини маълум қилган эди.