FIFA янги тинчлик мукофотини эълон қилди

FIFA 2026 йилги Жаҳон чемпионати қуръа ташлаш маросими чоғида янги  “FIFA Тинчлик мукофоти – Футбол дунёни бирлаштиради” (“FIFA Peace Award – Football Unites the World”) мукофотининг биринчи соҳибини эълон қилади. Бу ҳақда халқаро футбол ташкилоти расмий баёнотда маълум қилди.

Бу мукофот энди ҳар йили бутун дунё бўйлаб тинчликни мустаҳкамлаш ва инсонларни бирдамликда яшашга даъват этиш йўлида алоҳида ҳисса қўшган шахсларга берилади. FIFA бу мукофот орқали “тинчсизлик ва бўлиниш кучайиб бораётган даврда можароларга барҳам бериш, инсонларни тинчлик руҳида бирлаштириш йўлида жонбозлик кўрсатаётганларни” қадрламоқчи.

Биринчи “Тинчлик мукофоти” 2025 йил 5 декабрь куни АҚШнинг Вашингтон шаҳрида бўлиб ўтадиган  Жаҳон чемпионати 2026 қуръа ташлаш маросими чоғида FIFA президенти Жанни Инфантино томонидан тантанали равишда топширилади.

“Борган сари нотинч ва бўлинаётган дунёда можароларга барҳам бериш ҳамда инсонларни тинчлик руҳида бирлаштириш учун астойдил ҳаракат қилаётганларнинг меҳнатини эътироф этиш муҳим. Футбол тинчлик тарафдори. “FIFA Тинчлик мукофоти – Футбол дунёни бирлаштиради” бу инсонларни бирлаштириб, келажак авлодларга умид бағишлаётган фидокор инсонларнинг улкан саъй-ҳаракатларини эътироф этишдир”,  дейди FIFA президенти Жанни Инфантино.

Маълумот учун, футбол бўйича Жаҳон чемпионати 2026 йил 11 июнь 19 июль кунлари АҚШ, Канада ва Мексикада бўлиб ўтади. Бу сафар мусобақа тарихида илк бор 48 жамоа иштирок этади ва 16 та мезбон шаҳарда рекорд даражадаги 104 та ўйин ўтказилиши режалаштирилган.