Индонезия Президенти коррупционерлар учун алоҳида оролда қамоқхона қурмоқчи

Индонезия Президенти Прабово Субианто мамлакатда коррупцияга қарши курашни кучайтириш мақсадида алоҳида оролда махсус қамоқхона қуриш режасини маълум қилди. Бу ҳақда “Antara” хабар берди.
 
Маълумотларга кўра, ушбу қамоқхона коррупцияда айбланган жиноятчилар учун мўлжалланган бўлиб, давлат маблағларини ўзлаштирган шахслар жазони айнан шу ерда ўтайди.

“Мен коррупционерларга қарши курашдан чекинмайман. Улар мен бу миллат ва давлат учун ўлишга тайёр эканимни билишлари керак. Мен мафиядан қўрқмайман, чунки полиция бошлиғи, ҳарбий қўмондон ва ўқитувчилар менинг томонимда”, дейди Субианто.

Президентнинг таъкидлашича, давлат маблағларини ўзлаштиришдан энг кўп жабр кўрганлар — ўқитувчилар, шифокорлар, тиббиёт ходимлари ва фермерлар. Шу сабабли, у давлат муассасаларида бюджет маблағларининг самарали ишлатилишини таъминлашга ва масъулиятсиз шахслар томонидан суиистеъмол қилинишига йўл қўймасликка ҳаракат қилишини билдирди.

Шунингдек, Субианто коррупцияга қарши кураш бўйича бир неча маротаба баёнот берганини таъкидлади.

Эслатиб ўтамиз, аввалроқ Индонезиянинг аввалги президенти Жоко Видодо 10 сентябрда мамлакат пойтахтини Жакартадан янги қурилган Нусантара шаҳрига кўчиришга қарор қилгани ҳақида хабар берилган эди.