Глобал исиш қишки Олимпия ўйинларига таъсир қилмоқда

Глобал ҳарорат исиши сабабли Халқаро Олимпия қўмитаси (ХОҚ) қишки Олимпия ўйинларини қабул қилиши мумкин бўлган шаҳарлар рўйхатини қисқартириш масаласини кўриб чиқмоқда. Бу ҳақда ХОҚнинг қишки Олимпия ўйинлари мезбонларини танлаш бўйича комиссияси раиси Карл Штосс “Associated Press”га берган интервьюсида маълум қилди.

Тадқиқотчиларнинг фикрича, Ерда рекорд даражадаги исиш жараёни давом этар экан, келгуси йилларда қишки Олимпия ўйинларини барқарор ва ишончли тарзда ўтказиш мумкин бўлган жойлар сони кескин камаяди. Вазият шу қадар жиддий тус олганки, Халқаро Олимпия қўмитаси ўйинларни мос келадиган шаҳарларнинг доимий гуруҳи ўртасида навбатма-навбат ўтказиш масаласини кўриб чиқмоқда. Шунингдек, Паралимпия ўйинлари март ойида тобора илиқ об-ҳаво шароитида ўтаётгани сабабли, қишки ўйинларни мавсумнинг дастлабки даврида ташкил этиш эҳтимоли ҳам муҳокама қилинмоқда.

Штосснинг таъкидлашича, ХОҚ келажакда қишки Олимпия ўйинлари учун доимий спорт иншоотлари тизимини яратиб, уларни навбатма-навбат мезбонлик қилиш имкониятини кўриб чиқиши мумкин. Шунингдек, ўйинларни одатдагидан эртароқ муддатда ўтказиш режалаштирилмоқда. Бу Паралимпия ўйинлари Олимпиададан икки ҳафта ўтиб бошланиши ҳамда мезбон шаҳарлардаги илиқ об-ҳаво билан боғлиқ.

Ватерлоо университети профессори Даниэля Скотт ва Инсбрук университети доценти Роберт Штайгер томонидан ўтказилган тадқиқотга кўра, ҳозирда қишки спорт мусобақаларини ўтказиш учун етарли инфратузилмага эга бўлган 93 та тоғли ҳудуддан фақат 52 таси 2050 йилларга бориб ушбу талабларга жавоб бера олади. 2080 йилга бориб эса бу кўрсаткич 30 тага камайиши мумкин.

Маълумот учун, 2026 йилги қишки Олимпия ўйинлари Италиядаги Милан ва Кортина-д’Ампеццо шаҳарларида бўлиб ўтади. Мусобақалар жорий йилнинг 6-22 февраль кунлари бўлиб ўтади.