Халқаро Олимпия қўмитаси Инфантинони жазоламайдиган бўлди

Халқаро Олимпия қўмитаси (ХОҚ) АҚШ терма жамоаси ҳужумчиси Фоларин Балогуннинг дисквалификацияси бекор қилингани муносабати билан FIFA президенти Жанни Инфантинога нисбатан ҳеч қандай санкция қўллашни режалаштирмаяпти. Бу ҳақда ХОҚдаги манбаларига таяниб, “The Guardian” нашри хабар берди.

Аввалроқ, FairSquare нотижорат ташкилоти Инфантинонинг хатти-ҳаракатлари юзасидан ХОҚ’га расмий шикоят киритганини маълум қилган эди. Манбага кўра, шикоят Балогуннинг дисквалификацияси бекор қилингани билан боғлиқ.

Нашр кўриб чиққан, дея таъкидланган 10 саҳифалик ҳужжатда, “қарор АҚШ Президенти томонидан Жанни Инфантинога ўтказилган сиёсий босим таъсирида қабул қилинганини кўрсатувчи ишончли далиллар мавжуд”, дейилган.

FairSquare фикрича, Инфантино 2020 йилда Лозанна шаҳридаги ХОҚ бош қароргоҳида қабул қилган қасамёдини бузган. Унда FIFA раҳбари тижорат ва сиёсий манфаатлардан мустақил равишда фаолият юритишга ваъда берган эди.

Таъкидлашича, ХОҚ халқаро спорт федерацияларининг ўз ички қоидаларини қўллаш жараёнига аралашишни истамайди. Нашрнинг яна бир манбаси эса сўнгги йигирма йил ичида ХОҚ ва FIFA ўртасидаги кучлар мувозанати футбол ташкилоти фойдасига сезиларли даражада ўзгарганини айтган. 

Эслатиб ўтамиз, Фоларин Балогун Жаҳон чемпионати 1/16 финалида Босния ва Герцеговинага қарши учрашувда (2:0) ҳимоячи Тарик Муҳаремовичга нисбатан қўпол ҳаракати учун қизил карточка олган эди. Америкалик футболчи рақибининг оёғи орқа қисмига бутсасининг тишлари билан зарба берган.

Жорий йилнинг 5 июль куни FIFA Интизом қўмитаси Балогуннинг дисквалификациясини бекор қилди ва ҳужумчига Бельгияга қарши 1/8 финал учрашувида (1:4) майдонга тушишга рухсат берди.